Ныртӕккӕ нӕ республикӕйы 40 мин цӕрӕджы сӕ ныййарӕджы капиталы спайда кодтой, цӕрыны уавӕртӕ фӕхуыздӕр кӕнынмӕ, ипотекӕ бафидынӕн кӕнӕ та хӕдзары арӕзтадӕн
1-æм февралæй фæстæмæ мадæлты капитал æмæ ма цалдæр æндæр пососбийы æрцæудзысты индексаци гонд 8,4%. Фыццаг сывæллонæн капиталы бæрц уыдзæн 524,5 мин сомы, дыккаг сывæллонæн та – 693,1 мины. Æрмæст бинонтæ фыццаг сывæллонæн капитал кæд нæ райстой, уæд. Кæд æмæ йæ райстой, уæд та дыккаг сабийы райгуырдæн уæлæмхасæн фиддон уыдзæн 168,6 мин сомы. Уæвгæ та мадæлон капиталы бæрцмæ, инфляци хынцгæйæ, ногæй æркæсдзысты алы аз дæр. Гуытъиаты Алинæ радзурдзæн бæлвырддæр хабæрттæ.
Цалынмӕ бинонты хистӕр куыстӕй нӕма ӕрбацыд, уӕдмӕ уал мад йӕ чызджытимӕ пълӕнттӕ кӕны, сӕ хӕдзар куыд хуыздӕр саив кӕндзысты. Ахӕм ӕхсызгондзинадмӕ Уалытӕ ӕнхъӕлмӕ кастысты дӕс азы. Фатер ис ног арӕзт хӕдзары, хорз районы. Цӕуы йӕм ӕхсӕнадон транспорт, йӕ алыварс та ис парктӕ ӕмӕ тезгъогӕнӕн бынӕттӕ. Ӕрыгон бинонты ма хуыздӕр цы хъӕуы?
Ацы егъау ӕмӕ райдзаст фатер Аланӕ ӕмӕ йӕ цардӕмбал балхӕдтой ныййарӕджы капиталы фӕрӕзтӕй. Иу милуан сомы та сын радта паддзахад, бинонтӕн ӕххуысы программӕйы фӕрцы. Уыцы фӕрӕзтӕ зынгӕ фӕрогдӕр кодтой ӕрыгон бинонты къух. Цы хца ма сӕм баззад уыдонӕй та цалцӕг скӕндзысты.
Дзасохты бинонтӕ нырма нӕма бауынаффӕ кодтой, сӕ сертификатӕй куыд хуыздӕр спайда кӕндзысты уый тыххӕй. Бинонты ис ӕртӕ сывӕллоны ӕмӕ гӕнӕн ис, уыцы ӕхцатӕ сӕ ахуырӕн кӕй бахъӕудзысты уый. Афӕдздзыд Сабринӕ нырма дзурын нӕма сахуыр, йӕ хистӕр ӕфсымӕртӕ Хетӕг ӕмӕ Георгий та тагъд бацӕудзысты скъоламӕ. Лӕппутӕ уарзынц машинӕтӕ ӕмӕ конструктортӕ, ӕмӕ уый нымайгӕйӕ ныййарджыты фӕнды сӕ цотӕн техникон ахуырад радтын.
Ныртӕккӕ нӕ республикӕйы 40 мин цӕрӕджы сӕ ныййарӕджы капиталы спайда кодтой, цӕрыны уавӕртӕ фӕхуыздӕр кӕнынмӕ, ипотекӕ бафидынӕн кӕнӕ та хӕдзары арӕзтадӕн. Паддзахадон ӕххуысы бӕрц нӕ республикӕйы у 15 миллиард сомӕй фылдӕр. Ацы аз февралӕй фӕстӕмӕ та ныййарӕджы капитал зынгӕ фӕфылдӕр. Паддзахадон Думӕ сфидар кодта сертификаты фӕрӕзты индексаци 8 процентӕй фылдӕр. Фыццаг сывӕллонӕн фиддзысты 524 мин сомы, дыккагӕн та 693 мин сомы. Сертификат райсынӕн ныртӕккӕ ӕппынфылдӕр хъӕуы 15 минуты.
