Абон нæ бæстæйы историйы у ахсджиагдæр бонтæй иу
Абон нæ бæстæйы историйы у ахсджиагдæр бонтæй иу. 1942 азы 17 июлæй – 1943-æм азы 2 февралы онг цыди Сталинград суæгъд кæныны тох. Хæстон цаутæ цыдысты нырыккон Воронежы, Ростовы, Волгограды облæстты æмæ Хъалмыхъы республикæйы территорийы. Зæгъæн ис æмæ Сталинграды тох сси æппæтæй карздæр æмæ тугкалæн рæстæг Фыдыбæстæйы Стыр хæсты историйы. Суанг ма йæ хатдзæгтæгæнæн тох дæр хонынц. Сталинград суæгъд кæныныл чи архайдта, уыдонæй иу уыд не мзæххон Гериты Михаил. Йæ цардвæндагыл афæлгæст Тъехты Элинæ.
Гериты Михал 1939 аз каст фæци Орджоникидзейы æппæтæфсæдты училищæ. 22 июны, райсомæй 8 сахатыл йæ ротæ лæууыдис Советон Цæдисы иугонд æмæ Румынийы хсæн цæугдон «Пруд»-ы. Уым цыдис йæ фыццаг тох знагимæ. Данилы фырт Михал фыццæгты хæцыд мысанæхсæн æфсæдты, уый фæстæ йæ арвыстой танкты бригадæмæ офицерæй. 1 ноябры, 1942 азы æрвыст æрцыд Сталинградмæ. 1943-æм азмæ службæ кодта танк Т-34-йæн адæм кæм цæттæ кодтой, уым.
25-æм танкон корпусы капитан Гериты Михал хæцыд Брянскы, уый фæстæ 1-æм Украинаг фронты. Житомиры æмæ Бердычевы операцийы рæстæг æфсæддонтæ хъуамæ байстаиккой горæт Новоград-Волынский. Уым уыдысты немыцаг 3 дивизийы тыхтæ.
Фыдыбæстæйы Стыр хæсты фæстæ Гериты Михал службæ кодта æфсады, стæй та куыста адæмон хæдзарады. Йе `мкъаимæ схъомыл кодтой æртæ фырты. Гериты Петр цымыдиссагæй хъуыста йæ фыдмæ, хæсты кой йын иу куы кодта, уæд. Хæххон инженер уæвгæйæ, ныффыста 400 очеркы æмæ статьяйы Фыдыбæстæйы Стыр Хæсты тыххæй.
Ахсджиаг у нæ бæстæйы истори зонын, рох кæнæн ын нæй. Æнæмæнг æй хъæуы дзурын рæзгæ фæлтæрæн, цæмæй уыдон дæр зоной нæ хистæр фæлтæрты хъæбатырдзинад. Уыцы хъуыдыйыл хæст у Гериты Петр дæр.
