Сæ иу республикон газет «Дигорæ»-йы сæйраг редактор Сакъиты Эльбрус
Адæмыхатты хæзна сты йæ адæм, йæ культурæ, традицитæ æмæ æгъдæуттимæ. Азты сæрты уыцы хъуыддæгтæ хæссыныл чи кусы, уыдон та сты уæлдай кады аккаг. Сæ иу республикон газет «Дигорæ»-йы сæйраг редактор Сакъиты Эльбрус. Аив дзырды дæсны йе 75 азы юбилей сбæрæг кодта йæ куысты бынаты. Сакъиты Эльбрусы цардыл афæлгæст Сосранты Жаннæ æмæ йын бакæсæм йæ сюжетмæ.
Сакъиты Эльбрусыл йæ юбилейы фæдыл æрфæтæ æмбæлын кодтой йæ кусæнуаты. Куыд фæзæгъынц – рæстæг дугъон бæхæй уæлдай нæу. Фæлæ абоны куырыхон хистæр, Ирыстоны кадджындæр лæгтæй иу, мадæлон æвзаг æмæ фыдæлты æгъдæуттæ хъахъхъæнæг æмæ сæ фæлтæртæм хæссæг Сакъиты Эльбрус сбæрæг кодта йæ 75 азы юбилей. Куыд зæгъы, афтæмæй азты бæрц диссаг нæу, сæйрагдæр у, уыцы рæстæгмæ цы бантыст æхсæнадæн саразын, уый.
Бæгуыдæр, Сакъиты Эльбрусы зæрдæхæлардзинадæн бирæ æвдисæнтæ ис. Кæд йæ сабибонтæ æнцондæртæй нæ уыдысты, уæддæр йæ ныййарджытæ ардтой амæлттæ сæ сывæллæтты ахуыры фæндагыл сæвæрынæн.
Эльбрус, скъолайы ахуыр кæнгæйæ йæхи сфæлдыстадон куысты хъæппæрисджынæй кæй æвдыста, уымæй æрвыст æрцыд сывæллæтты лагерь Артекмæ. Уым, уацхæсджыты къорды фæцахуыр уацтæ фыссыныл. Æмæ скъолайы фæстæ республикæйы номæй æрвыст æрцыд Ростовы университетмæ журналистикæйы фæкультетмæ.
Сакъийы фырт мадæлон æвзаджы райрæзт æмæ йæ бахъахъхъæнынмæ цы стыр æвæрн хæссы, газет «Дигорæ»-йы сæргъы лæугæйæ, уый та хицæн ныхасы аккаг у. Йæ уыцы фæллæйттæн ын аргъ чи кæны, уыдонæй иу у нæ республикæйы зындгонд дохтыр Хъуылцыты Æхсарбег.
Сакъити Эльбрус абон дæр лæууы республикон газет «Дигорæ»-йы сæргъы. Цы рæстæг дзы кусы, уæдæй «Дигорæ» фæаивдæр, арæхдæр цæуын райдæдта, уыимæ та фæфылдæр йæ коллектив. Гæздæнты æфсымæрты, афтæ Æмбалты Цоцкойы номыл премиты лауреат, РЦИ-А культурæйы сгуыхт кусæг Сакъиты Эльбрус кусы мадæлон æвзаг, нæ фыдæлты истори бахъахъхъæныл. У алы æмвæзады сфæлдыстадон конкурсты уæлахиздзау.
Азтæ кæрæдзийы ивынц, фæлæ ахсджиаг у сæ цыдимæ нæ кадджын æмæ фæрнджын хистæрты нæмттæ фæлтæртæм хаст куыд цæуой. Уыцы фарстайы дæр Сакъиты Эльбрусы фæлтæрддзинад бирæтæн у дæнцæгæн хæссинаг.
