Нымæцон миграци, зæгъæн ис, æмæ бацыд йæ тыхы
Ныртæккæйы уавæртæм се ргом аздæхтой социалон хызтæй пайдагæнджытæ дæр. Нымæцон миграци, зæгъæн ис, æмæ бацыд йæ тыхы. Блогертæ, смм-специалисттæ, хуымæтæг пайдагæнджытæ фæсарæйнаг платформæтæй рахызтысты бынæттон фæзтæм. Куыд сын уайы ацы хъуыддаг, уый базоныныл бацархайдта не сфæлдыстадон къорд, æмæ бæлвырддæр хабæрттæ радзурдзæн Гуытъиаты Алинæ.
Хъодзаты Зитæ у, нырыккон уæлæдарæс чи уадзы, ахæм бренд саразæг. Йæ сконд дзаума зæрдиагæй дарынц блогертæ, эстрадæйы артисттæ, æмæ æндæр зындгонд адæм. Уыцы къабазы Зитæ кусы авд азы. Йæ дæсныдзинадимæ рæзтис социалон хызы аудитори дæр. Зитæйы конд уæлæдарæс интернеты фæрцы базыдтой дунейы алы рæттæй æртын мин адæймаджы бæрц. Инстаграм фæстаг азты дæргъы ссис чысыл æмæ астæуккаг амалхъомады райрæзты фæрæз. Иуæй дзы дæ лæггæдтæ æмæ товар уæц кæныс, иннæмæй та рекламæйы фæрцы æхца кусыс. Ныртæккæ уыцы гæнæнтæ кæй æруырæдтой, уый бирæтæн хурбон арвнæрдау фæцис. Æнæ аудиторийæ баззадысты зарæггæнджытæ, блогертæ, стæй æхсæнадон архайджытæ. Цæрикъаты Фатимæйы инстаграм æрæмбырд кодта дыууæсæдæ мин адæймаджы бæрц. Йæ курдиатуарзджытæ интернеты уылты зæрдиагæй цæст дардтой зарæггæнæджы цардмæ, цин кодтой йæ æнтыстдзинæдтыл.
Социалон хыз кæй æрæхгæдтой, уый сæхиуыл банкъардтой профессионалон пайдагæнджытæ сеппæтдæр. Экспертты хъуыдымæ гæсгæ, уæрæсейаг блогерты хъысмæт бынтон зæрдæхсаинаг нæу. Фæстаг къуыри уымæн æвдисæн. Уæрæсейаг социалон хызты кад цалдæр боны дæргъы зынгæ фæбæрзонддæр.
Блогертæ ныртæккæ фæлварынц æндæр нымæцон платформæтыл æрбынат кæнын. Инстаграмы рекламæйы зилдух æрмæст Уæрæсейы уыдис сæдæ фæндзай миллиард сомы. Телеграм, Вконтакте, Яндекс Дзен, Одноклассники сты уæрæсейаг фæрæзтæ, æмæ сæ бон Инстаграм баивын суыдзæн æви нæ, уый равдисдзæн рæстæг.
СММ-агентад саразæг Гæбуты Алан куыд радзырдта, афтæмæй рекламæйы фæрæзтæ зынгæ фæкъаддæр уыдзысты. Не мзæххонты хъæудзæнис ног уавæрты архайын. Кæй бон суа, уымæн зæгъæн ис æмæ йæ хал схаудта.
Экспертты хъуыдымæ гæсгæ, уавæр бынтон зæрдæхсаинаг нæу. Уæрæсейаг платформæтæ сты æнцонæмбарæн æмæ сыл не мзæххонтæ æнцонæй сарæхсдзысты. Ныртæккæ сæ саразджытæ архайынц, цæмæй сын сæ гæнæнтæ фæуæрæхдæр кæной. Уый фæрцы социалон хызты уылты уыдзæнис æхца бакусын дæр.
Виртуалон ивддзинæдтæн æнæрцæугæ нæй. Иу нымæцон фæзæй иннæ нымæцон фæзмæ рахизын чи зоны æмæ афтæ уæззау нæ уыдзæнис. Гæнæн ис æмæ авналæнтæ фæуæрæхдæр уыдзысты.
