Дзæуджыхъæуы Сергей Меняйлойы разамындæй арæзт æрцыд оперативон штабы æмбырд. Дзырдтой дзы республикæйы экономикæйы райрæзты, стæй чысыл æмæ астæуккаг амалхъомадæн æххуысы мадзæлттыл санкциты уавæры. Сергей Меняйло куыд бахахх кодта, афтæмæй ныртæккæ сæйрагдæр у социалон хæслæвæрдтæ кæронмæ сæххæст кæнын. Уый тыххæй бацархайын хъæуы, цæмæй инфраструктурæ æмæ объектты арæзтад ма рлæууой. Штабы куысты уыдзæнис дыууæ къабазы. Иу дæлхайад кусдзæнис æргъты рæзт æруыромыныл, иннæ та архайдзæн федералон æмæ регионалон программæтæ æххæст кæныныл. Цæмæй æппæт нысантæ дæр къухы бафтой, уый тыххæй республикæйы разамонæг бадомдта, цæмæй пайда кæной Уæрæсейы хицауады фарсхæцты мадзæлттæй. Уыдоны фæрцы нæ бон суыдзæнис президенты хæслæвæрдтæ сæххæст кæнын — бахахх кодта Сергей Меняйло. Республикæйы хицауад æмæ цæстдарæг оргæнтæн бабар кодтой, цæмæй бæлвырд кæсой æргъты уавæрмæ. Хъуамæ æнæмæнгхъæугæ товартæ æмæ хостыл æфтыд ма цæуа. Экономикæйы райрæзты министр Кучиты Зауыр куыд загъта, афтæмæй æргъты уавæрыл ахадæн ис æрмæстдæр монополиты ныхмæ службæ, инвестортæ æмæ регионалон компанитимæ æмархайды фæрцы. Уыйимæ бахахх кодта — ныртæккæ нæ республикæйысæкæр, ссад, макъаронтæ æмæ зети ис фаг. Фæлæ уæддæр хицæн адæймæгтæ барæй уавæр карздæр кæнынц, продукттæ æлхæнынц æмæ æвзæрын кæнынц мæнг дефицит. Сергей Меняйло ведомствæйы разамонæгæн бабар кодта, цæмæй бацархайа дзулы аргъ раздæры æмвæзадыл ныууадзын.
