Нæ регионы разамонæг радта Кузнецовæн «Республикæ Цæгат Ирыстон-Аланийы кадджын цæрæджы» ном
Цæгат Ирыстоны сæргълæууæг Сергей Меняйло фембæлд историон наукæты докторимæ, археологимæ æмæ историйы раззагдæр специалист Владимир Кузнецовимæ. Ирон адæмы истори иртасыны æмæ культурон бынтæ хъахъхъæныны куыстмæ стыр æвæрæн кæй бахаста, уый тыххæй Владимир Кузнецовæн нæ регионы разамонæг радта «Республикæ Цæгат Ирыстон-Аланийы кадджын цæрæджы» ном. «Стыр арфæ дын кæнын, нæ кадджын хистæр. Цы ахадгæ куыст кæныс нæ гыццыл республикæйæн, уымæн аргъ нæй. Дæ царды сæйрагдæр хъуыддагыл дæ иузæрдион. Дæ фæлтæрддзинад æнæвгъауæй лæвар кæныс кæстæртæн. Мæ зæрдæ дын зæгъы фидар æнæниздзинад! – загъта Сергей Меняйло. Владимир Кузнецов дæр загъта бузныджы ныхæстæ республикæйы разамонæгæн, ахæм аргъ ын кæй скодта, уый тыххæй. Ахуыргонд куыд радзырдта, афтæмæй тынг разы у, йæ цард Ирыстонимæ æмæ ирон адæмы истори иртасынимæ кæй сбаста, уымæй. Владимир Кузнецов бирæ азты дæргъы кодта археологон иртæстытæ æппæт Цæгат Кавказыл. Уыцы куысты хатдзæгтæ бавæрдта йæ бирæ чингуыты æмæ монографиты. Фарон Цæгат Ирыстоны арæзт æрцыд стыр ахуыргонды наукон-публицистон куысты презентаци – «Кто мы? Осетины – аланы Кавказа». Уый уыд егъау архайды хатдзæг Рагон Алани иртасыны куысты.
