Артисттæ лæппутæн æмæ чызджытæн равдыстой рагон нарты цардæй ист инсценировкæтæ
Ирд сценикон уæлæдарæс, рагон традицион музыкæ æмæ ирон кæфтытæ. Донецкы æмæ Луганскы адæмон республикæтæй Цæгат Ирыстонмæ цы сывæллæттæ ссыдысты, уыдон хуынд æрцыдысты бæхты театрмæ. Артисттæ лæппутæн æмæ чызджытæн равдыстой рагон нарты цардæй ист инсценировкæтæ. Сывæллæттæ ныртæккæ хæстон цаутæй сты дард. Рæстæгмæ айрох кодтой сæ райгуырæн бæстæйы зындзинæдтæ. Театрмæ балц куыд рауад, уый тыххæй радзурдзæн Бокоты Виктория.
Профессионалон джигитовкæ, национ мелодитæ æмæ цыппаркъахыг артистты хæстæгмæ фенынын фадат цæхæртæ скалын кодтой æвзонг аивадуарзджыты цæстыты. Нæ бæстæйы иунæг чи у, уыцы бæхты театр «Нарты» разамонæг Сихъоты Тимуры хъæппæрисы фæрцы, Донецкы æмæ Луганскы адæмон республикæтæй æрлидзæг адæм бабæрæг кодтой ацы цымыдисаг постановкæ.
Ксения Дзæуджыхъæумæ ссыди Мариуполæй, йе стыр бинонтимæ иумæ. Æдæппæтæй сты 10 адæймаджы. Ныр къуырийы бæрц нал хъусынц хæцæнгарзы æхстытæ æмæ сармадзанты гуыппытæ. Уыцы мгъуыдмæ, зæгъæн ис, æмæ аивтой йæ царды бæллицтæ æмæ нысантæ.
Бæхты театры сценæйы – рагон нарты цардæй ист нывтæ. Уымæй дарддæр – хъаматимæ кафт æмæ чызг æскъæфты æгъдауы сусæгдзинæдтæ. Раст зындгонд кинонывы куыд уыди, афтæ. Нæ республикæйы уазджытæн ма фадат уыд артисттимæ иумæ сценæмæ рацæуынæн, æмæ сæхи курдиæттæ раргом кæнынæн. Суанг инчценировкæйы дæр бацархайдтой.
Ирд æмæ аив уæлæдарæс, традицион музыкæ, национ кæфтытæ. Ацы хъуыддæгтæ се ппæт дæр сæ зæрдыл æхсызгонæй бадардзысты театрдзаутæ. Фæлæ æппæты кæстæртæ та никуы уал ферох кæндзысты сæйраг хъайтарты – театры бæхты.
Сывæллæттæ ныртæккæ хæстон цаутæй сты дард. Сæ цæсгæмттыл мидбылхудт æмæ райдзаст цæстæнгас. Зæгъæн ис, æмæ рæстæгмæ айрох кæнынц сæ райгуырæн бæстæйы зындзинæдтæ. Æмæ уый тыххæй рацæуынц артисттæ сценæмæ. Цæмæй сæ курдиатæй адæмæн лæвар кæной рæсугъд æнкъарæнтæ æмæ рухс фидæнмæ бæллицтæ.
