Аварион хæйттæ хаст цæуынц «Пырх фæндæгты картæ»-мæ, стæй сæ арвитынц дзуапдæттæг ведомствæтæм
Адæмон фронты минæвæрттæ дарддæр мониторинг кæнынц республикæйы фæндæгты уавæр. Аварион хæйттæ хаст цæуынц «Пырх фæндæгты картæ»-мæ, стæй сæ арвитынц дзуапдæттæг ведомствæтæм. Ахæм фæткмæ гæсгæ, фæндæгтæ цалцæггонд æрцæуынц тагъддæр. Активисттæ ацы хатт цавæр уынгтæ бабæрæг кодтой, уый тыххæй радзурдзæн Касаты Наирæ.
Машинæйæ йæ сæйраг хай куыд цæуы, уый базонынæн тагъд скъæрын нæ хъæуы. Адæмон фронты экспертты ныхæстæм гæсгæ, уый банкъарæн ис, сахатмæ 40 км ацæугæйæ дæр. Æмæ уый, шофырты æмæ бæлццæтты æдасдзинадыл нæ дзургæйæ. Ахæм аварион уаццæгтæ Доваторы проспекты гыццыл нæй.
Радон пункт – Владикавказскийы уынг. Фæлтæрдджын шофыртæ зонынц фæндаджы пырх уаццæгтæ, æмæ архайынц иувæрсты цæуын. Сæхæдæг куыд зæгъынц, афтæмæй миты фæстæ асфальт дæр атад.
Адæмон фронты активисттæ бæрæг кæнынц, нырма гаранти кæмæн ис, фæндæгты уыцы хæйттæ. Уый та фæндаг эксплуатацийы раттынæй 7 азы.
Специалисттæ ма бабæрæг кодтой, фæткмæ гæсгæ цалцæггæнæн куыстытæ кæм цæуынц, уыцы рæттæ дæр. Се хсæн Владикавказскийы уынджы фæндаджы иу хай. Ам арæзт цæуынц къахвæндаг æмæ бордюртæ. Ам хæстæг сквер кæй ис, уымæ гæсгæ та, дзы сæвæрын хъæуы пандус дæр. Ахæм у ног фæтк. Ахæм рацарæзт хъуамæ æрцæуа æхсæнадон организацитæм хæстæг цы фæзтæ ис, уыдоны се ппæты дæр. Московскийæ Дзусты Ибрагимы уынджы онг сног кæндзысты фæндаджы уæлцъар. Куыстытæ кæронмæ фæуыдзысты сентябры онг.
