Дзæуджыхъæуыл бæрзондæй афæлгæсыны фадат се ппæтæн дæр уыдзæн майæ фæстæмæ
Хетæгкаты Къостайы номыл Центрон парчы эксплуатацийы радтой аттракцион фæлгæсæн цалх. Дзæуджыхъæуыл бæрзондæй афæлгæсыны фадат се ппæтæн дæр уыдзæн майæ фæстæмæ. Аттракцион райхæлдтой ивгъуыд аз ноябры. Арвыстой йæ, арæзт кæм æрцыд, уыцы заводмæ Волгоградмæ. Уым ын скодтой бындурон диагностикæ æмæ йæ сцалцæг кодтой. Базылдысты йын йе ддаг бакастмæ дæр. Рацарæзт цыди 4 мæйæ фылдæр. Техникон регламенты домæнтæн дзуапп кæй дæтты, уый тыххæй сертификаттæ ныридæгæн райстой. Уый та дзурæг у ууыл, æмæ æппæт механизмтæ кæй сты æдас. Домæнтæн дзуапп дæттынц парчы иннæ аттракционтæ дæр. Фæлгæсæн цалхы рацарæзты инвестициты бæрц у 30 милуан сомæй фылдæр. Фæлæ парчы разамынды ныхæстæм гæсгæ, уый нæ фæбæрæг уыдзæн билетты аргъыл.
