Ног трассæ фадат ратдзæн транзитон транспортæн хорз уавæртæ саразынæн
Сæ тæмæны бацыдысты Дзæуджыхъæуы иувæрсты цæуæг фæндæгтæ аразæн куыстытæ. Ног трассæ фадат ратдзæн транзитон транспортæн хорз уавæртæ саразынæн. Объекты сæйраг бынæттæ ныридæгæн нысангонд æрцыдысты. Арæзтадон куыстытæ уыцы-иу рæстæг цæуынц цалдæр уаццагыл. Бæлвырддæр хабæрттæ радзурдзæн Фидараты Маринæ.
Ацы проект Цæгат Ирыстоны нымад у æппæтæй егъаудæрыл. Дзæуджыхъæуы иувæрсты цæуæг фæндаг бабæтдзæн 3 федералон трассæйы. Æмæ æртæ дæр цæудзысты республикæйы сæйраг горæтмæ.
Ныртæккæ Гуырдзыйы рдæм æппæт транзитон транспорт цæуы Дзæуджыхъæуы уынгтыл. Иу суткæмæ горæты уылты æрмæст уæзласæнтæ ацæуынц цалдæр сæдæгай машинæтæ. Уый та у стыр уаргъ. Хъыгдард æййафынц фæндæгтæ, экологи. Шофыртæ æмæ бæлццæттæ бирæ рæстæг баззайынц фæндагыл лæугæйæ. Ног фæндаг алыг кæндзæн æппæт фарстатæ. Сæйраг бынæттæ ныридæгæн дæр сбæрæг сты.
Арæзтады архайынц 600 кусæгæй фылдæр æмæ ма сæрмагонд нырыккон техникæйы дæсгай машинæтæ. Уыцы-иу рæстæг куыстытæ цæуынц цалдæр уаццагыл. Объект ис, сейсмикон æгъдауæй активон зонæйы. Уымæ гæсгæ арæзтадмæ ис бирæ æмæ бæлвырд домæнтæ.
Объектмæ ма хауынц стыр æрлæууæн бынат 400 уæзласæн æмæ 200 рог машинæйæн. Ам арæзт æрцæудзысты иттæг хорз уавæртæ шофыртæн æмæ бæлццæттæн дæр: хи найæн, фæлладуадзæн уæттæ, стæй ма сывæллæттæн ирхæфсæн фæзтæ.
Ног фæндаг сифтонг кæндзысты æдасдзинады нырыккон фæрæзтæй. Сæвæрдзысты видеокамерæтæ. Уырдæгæй бæрæггæнæнтæ æрвитдзысты диспетчерон центрмæ. Объекты арæзтад райдыдта афæдзы размæ. Пъланмæ гæсгæ хъуамæ сцæттæ уа 2024-æм азы. Фæлæ куыстытæ афтæ рæвдз æмæ арæхстджынæй куы цæуой, уæд, гæнæн ис, æмæ объект эксплуатацийы радтой фидæн аз.
