Сæ уарзон хъæубæсты бæрæгбонмæ æрбахуыдтой, куыд йæ рацæуджыты, афтæ сыхаг республикæтæй уазджыты дæр
Цæгат Ирыстоны дæрддзæфдæр хъæутæй иу Иран сбæрæг кодта йæ 95 азы юбилей. Сæ уарзон хъæубæсты бæрæгбонмæ æрбахуыдтой, куыд йæ рацæуджыты, афтæ сыхаг республикæтæй уазджыты дæр. Уал азмæ Ираныхъæуы ныффидар бирæ рæсугъд æмæ хъæздыг традицитæ. Бæрæгбоны уыд не сфæлдыстадон къорд дæр. Бæлвырддæр радзурдзæн Касаты Наирæ.
Кæд боны ахаст сæ хæрзтæй нæ уыди, уæддæр райсомæй фæстæмæ, ам уыди бæрæгбонхуыз. Ираны алы цæрæгæн дæр у стыр цау. Рæмонаты Хазби у хъæуы хистæртæй иу. Куыд зæгъы, афтæмæй æнусы юбилеймæ сæхи цæттæ кодтой иууылдæр иумæ. Сæ райгуырæн хъæубæстæмæ сæм ис уарзондзинады æнкъарæнтæ.
Иран у хъæздыг æгъдæуттæ æмæ традицитимæ хъæу, уæздан цæрджытимæ. Ам сæ иу кæны бирæ азты æнгом бастдзинæдтæ. Хъæуы схъомыл бирæ фæлтæртæ. Иуылдæр сæрыстыр сты сæ хъæубæстæйæ. 20-æм æнусы райдиан ацы зæххытæ хонын райдыдтой «йæ-ран». Ома, ацы ран зæгъгæ. Уый фæстæ дзырдбаст райдыдтой æмхæстæй фыссын æмæ дзурын. Афтæ, Цæгат Ирыстоны фæзынди Хæстæг Скæсæны гыццыл хай.
Нырыккон Иран у, стыр фидæн кæмæ æнхъæлмæ кæсы, ахæм хъæу. Фарон цалдæр номинацимæ гæсгæ систы æппæтуæрæсеон конкурсы уæлахиздзаутæ. Уый сын фадат радта бирæ хъуыддæгтæн бындур сæвæрынæн. Сцалцæг кодтой бынæттон зæрдылдарæн бынат – Фыдыбæстæйы Стыр хæстæй чи нал сыздæхт, уыдоны номыл мемориал. Фæзынди дзы быру, къæйдур, сног кодтой мрамор.
Грантты æххуысы фæрцы Ираны фæзындзæни сывæллæттæн хъазæн фæз æмæ спортивон зал. Нырмæ дзы никуы уыди. Ныридæгæн сын бацæттæ кодтой проектон-сметон документаци. Объектты арæзтад райдайдзæн иннæ аз.
Номинацийы архайдтой Уæрæсейы 70 субъекты 280 муниципалон сконды. Хъæуы цæрджыты хъæппæрисæй Иранмæ бацæуæны сæвæрдзысты, рухс чи кæны, ахæм стелæ. Рахизырдыгæй йыл фыст уыдзæн хъæуы ном, галиуырдыгæй та – бындур æвæрд ын кæд æрцыди уый – 1927-æм аз. 95 азы Иран фыссы йæ истори. Иттæг хорз географион бынат сын кæй ис, уый фæрцы сын æнгом æмæ хæлар ахастдзинæдтæ ис сыхаг республикæтимæ. Хъæу ис хъæдты æмæ цæугæдæтты астæу. Алæмæты æрдз æмæ адæмы тырнындзинад бæллиццаг фидæнмæ сты хъæуы райрæзты фыццаг æууæлтæ.
