Республикæйы арæзт æрцыдысты фысымуæтты æмæ ресторанты бизнесы кусджыты цæттæ кыныны курсытæ
Францусаг кулинарон диссæгтæ – Ирыстоны зæххыл. Нæ республикæйы арæзт æрцыдысты фысымуæтты æмæ ресторанты бизнесы кусджыты цæттæ кыныны курсытæ. Ирыстойнаг шеф-повартæн дæсныйадæвдисæг ахуыртæ кæны зындгонд францусаг хæринаггæнæг, Мишлены стъалыйы хицау Давид Эммерле. Фæстаг азты Цæгат Ирыстоны зынгæ фæфылдæр туристты нымæц. Уыимæ рæзынц сервисмæ домæнтæ дæр. Сæрмагондæй уый тыххæй нæ республикæмæ ссыд дунейы хуыздæр хæринаггæнджытæй иу. Фидараты Маринæ радзурдзæн бæлвырддæр хабæрттæ.
Сельдерейы уидæгтæ, хус сæнæфсир æмæ стуры фыдæй, Мишлены стъалыйы хицау Давид Эммерле рауайын кæны хæрзад хойраг – равиоли. Йæ цæлгæнæны, зæгъæн ис, æмæ аразы кулинарон диссæгтæ. Уыцы сусæгдзинæдтæ æнæвгъауæй æргом кæны цæгатирыстойнаг шеф-повæртæн.
Шеф-повар Давид Эммерле нæ республикæмæ ссыди бæрнон хъуыддаджы фæдыл. 20 азы цы кулинарон сусæгдзинæдтæ базыдта, уыдон æрыгон æмкусджытæн бацамоныны тыххæй.
Чертхъоты Марат кулинарийы аивадимæ базонгæ йæ сабибонты. Ныр 8 азы дæргъы æрыгон адæймаг сæйраг хæринаггæнæгæй кусы Дзæуджыхъæуы ресторантæй иуы. Йæхæдæг куыд зæгъы, афтæмæй ног зонындзинæдтæ исын кæддæриддæр у тынг ахсджиаг.
Фысымуæтты æмæ ресторанты бизнесæн кадртæ цæттæ кæныны курсытæ арæзт æрцыдысты, æппæтадæмон фестиваль «Гастрономические сезоны» æххæст кæнгæйæ. Йæ бындурæвæрæг у Мæрзойты Наталья. Куыд радзырдта, афтæмæй йæм фидæнмæ дæр ис стыр нысантæ.
Кулинарон аивады сусæгдзинæдтæ базонынæн æмæ фæлтæрддзинадæй хай кæныны фадат уыдзæн цалдæр боны. Æмæ уый хорз у, уымæн æмæ дунейы алы адæмы хыттыты национ хæринæгтæ дæр банымайæн ис адæмы иугæнæг мадзалыл.
