Программæйы сæйраг домæн – цæмæй хъæуы газ уа, уымæн æмæ специалисттæ хæтæлтæ æвæрынц сæйраг газуадзæнæй
Уæрæсейы президент цы сæрмагонд программæ расидт, уый æххæст кæнгæйæ, алы цæрæгæн дæр йæ бон у курдиат бадæттын йæ зæххы хай кæнæ хæдзар газæй лæвар баххæст кæныны тыххæй. Уый тыххæй бæрнон организациимæ хъæуы бадзырд бафыссын. Дарддæр та цæуы проект аразыны процесс. Объект бабæрæг кæнынц специалисттæ, æмæ скæнынц бæстон бæрæггæнæн куыст. Уый фæстæ та бынаты фæкусы сæрмагонд бригад. Бæлвырддæр хабæрттæ радзурдзæн нæ уацхæссæг Тъехты Элинæ.
Лæвар æххуыс республикæйы цæрджытæн. Ацы аз йæ тыхы бацыд адæмы хæдзæрттæм лæвар газ цы проектмæ гæсгæ уадзынц, уый. Тезиаты Владимир Хъæдгæроны 10 азы дæргъы амадта хæдзар. Зымæгмæ йын сцæттæ, фæлæ йæ уазæлтты рæстæг æнæ тæвдæй уадзын тæссаг уыд. Уæд нæлгоймаг спайда кодта программæйæ. Куыд зæгъы, афтæмæй специалистты рæвдз куыстæй тынг разы у.
Тезиаты Владимир: «Бирæ рæстæг фæамадтон ног хæдзар. Фарон фæззæджы дзы тæвдгæнæнтæ куы сæвæрдтон, уæд мæ хъуыд газ бауадзын, фæлæ уыййас не ххæссыдтæн, æмæ фæсидтæн газ хæдзæрттæм чи æрбауадзы, уыдонмæ. Программæмæ гæсгæ мын æрбауагътой газ. Мæнæн уыд тынг æхсызгон. Бузныг сын зæгъын.»
Фарон апрелы Владимир Путин федералон æмбырдæн йе рвыстæджы бар радта йæ тыхы бацæуын газæй баххæст кæныны программæйæн. 2022 азы республикæйы 1334 цæрæджы сæ курдиæттæ балæвæрдтой, цæмæй сын газы хæтæлтæ лæвар бауадзой, уый тыххæй.
Программæйы сæйраг домæн – цæмæй хъæуы газ уа, уымæн æмæ специалисттæ хæтæлтæ æвæрынц сæйраг газуадзæнæй. Æрыдоны районы сæ курдиæттæ балæвæрдтой 93 цæрæджы. Уыцы 93-йæ 19-æн сæ фæндон сæххæст кодтой.
Дзасохты Арсен: «Курдиат нæм ныффыссынц æмæ æрбацæуæм объектмæ. Нæ куысты вæййынц зындзинæдтæ дæр, уымæн æмæ зæххы бын вæййы доны æмæ æндæр хæтæлтæ. Æмæ уымæ гæсгæ фæхъæуы лæмбынæг куыст кæнын. Доны хæтæлтæй бирæтæ сты уæлæнгай æвæрд, фæлæ доны кустуаты минæвæрттимæ æмхиц куыст кæнæм æмæ нын афтæмæй æнцондæр вæййы. Цæмæй иу хæдзармæ газ бауадзæм, уый тыххæй нæ бахъæуы иу бон. Стæм хатт дыууæ боны дæр.
Кæд зындзинæдтæ вæййы, уæддæр пъланмæ гæсгæ куыст цæуы иттæг хорз. Алы бон дæр хæдзæрттæм газ фæуадзынц æртæ бригады. Газæй баххæст кæныны программæ æххæстгонд куыд цæуы, уымæ йæ цæст дары профилон ведомствæ. Республикæйы 679 цæрæджы балæвæрдтой курдиæттæ, бадзырдтæ та бафыстой мин адæмагæй фылдæримæ. 2023 азæй фæстæмæ фæнд кæнынц 19 дæрддзæф хъæуы сæвæрын газы хæтæлтæ.
Программæ ахады 102 хæдзарæй фылдæрыл. Йе руаджы ацы азы кæронмæ газ бауаддзысты 1000 хæдзарæй фылдæрмæ.
