Йæ сæйраг нысан у – фæндаггон змæлды домæнтæ чи не ххæст кæны, уыцы шофырты æмæ фистæгæйцæуджыты рабæрæг кæнын
Фæндæгтыл æдасæй цæуыны паддзахадон инспекцийы кусджытæ федералон трассæ «Кавказ»-ы сарæзтой оперативон-профилактикон мадзал «Пешеход». Йæ сæйраг нысан у – фæндаггон змæлды домæнтæ чи не ххæст кæны, уыцы шофырты æмæ фистæгæйцæуджыты рабæрæг кæнын. Профилактикон акцийы рæстæг инспектортæ стыр æргом здæхтой канд, фæндаг чи нæ дæтты, ахæм машинæты хицæуттæм нæ, фæлæ ма фистæгæйцæуджытæм сæхимæ дæр. Уыдонæй бирæтæ арæх нæ феххæст кæнынц хуымæтæг домæнтæ, халынц фæндаггон змæлды фæтк æмæ фæндаджы сæрты ахизынц, кæм не мбæлы, ахæм рæтты. Пропагандæйы хайады кусджытæ ма адæмимæ кодтой æмбарынгæнæн куыст. Фистæгæйцæуджытæн дзырдтой, цæмæй фæндаджы сæрты хизгæйæ, уой къæрцъхъусдæр, æххæст кæной æппæт домæнтæ, ма тагъд кæной, светоформæ æппынæдзухдæр сæ цæст дарой, æмæ талынг рæстæг пайда кæной рухс здахæн элементтæй. Шофыртæн та амыдтой, цæмæй сæрмагонд ахизæнты машинæты цыд кæной къаддæр, æмæ цæттæ уой, фистæгæйцæуджыты рацыдмæ. Рейды рæстæг се ппæтæн дæр байуæрстой информацион буклеттæ.
