Ныхас цыд, социалон къабазы цы æнæпаддзахадон организацитæ кусынц, уыдоныл
Республикæйы Хицауады Сæрдары хæдивæг Тугъанаты Ларисæйы разамындæй арæзт æрцыд Координацион советы æмбырд. Ныхас цыд, социалон къабазы цы æнæпаддзахадон организацитæ кусынц, уыдоныл. Стæй сын бюджетон фæрæзтæ дих кæныныл æмæ социалон лæггæдтæ кæныныл. Æмбырды архайдтой æххæстгæнæн хицаудзинады оргæнты разамонджытæ, республикæйы муниципалон скондты минæвæрттæ æмæ амалхъом æхсæнады уæнгтæ. Уæвгæ координацион совет у хицауады æмæ æнæкоммерцион секторы хсæн бæстон ныхасы фæз. Иумæйаг хъарутæй лыггонд цæуынц социалон фарстатæ. Уый та у нæ сæйрагдæр хъуыддаг, – загъта Тугъанаты Ларисæ. Экономикон рæзты министр Кучиты Зауыр куыд загъта, афтæмæй абоны онг стыр куыст бакодтой социалон амалхъомдзинадæн æмæ бархиондзинадæн æххуысы фæдыл.
Цæгат Ирыстоны æнæкоммерцион организацитæ цы лæггæдтæ кæнынц, уыдоны хсæн сты – иумæйаг æмæ уæлæмхасæн, стæй скъолайы агъоммæйы ахуырады къабæзтæ. Арæзт цæуынц культурон-дзыллон мадзæлттæ. Уымæй дарддæр стыр æргом здахынц наркоманийы ныхмæ тох кæнынмæ æмæ социалон фæллоймæ. Цæгат Ирыстоны экономикон рæзты министрад бакуыста регионалон фæндаггон картæйыл 2021-24 азтæн. Кучиты Зауыры ныхæстæм гæсгæ ног докмент фадат дæтты, адæмæн лæггæдтæ дæттыны хыгъд фæуæрæхдæр кæнынæн. Сфидар кодтой муниципалон скондты рейтинг æмæ сын æххуысы мадзæлтты пълан. Фембæлды архайджытæ ма æрныхас кодтой ивгъуыд азы куысты хатдзæгтыл, æмæ ацы азы сæйрагдæр хъуыддæгтыл.
