Æхсæнадон организаци «Ирон Федераци» æххуыс кæны диалогтæ мадæлон æвзагмæ тæлмац кæныны хъуыддаджы
Мультипликацион нывты зындгонд хъайтартæ арæхдæр дзурын райдыдтой иронау. Æхсæнадон организаци «Ирон Федераци» æххуыс кæны диалогтæ мадæлон æвзагмæ тæлмац кæныны хъуыддаджы. Проект «Родная анимация»-йы архайынц профессионалон актертæ. Ныхасы бар Гæджиты Сосланæн.
Æппæтдунеон æхсæнадон змæлд «Иры стры Ныхас»-ы байгом кодтой, мультипликацион кинонывтæ ирон æвзагмæ кæм тæлмац кæндзысты, ахæм студи. Уыцы хъæппæрис фæзынд Ирон федерацийы минæвæрттæм. Куыстытæ цыдысты культурон хъæппæристы президентон фонды руаджы.
Цгъойты Тамерлан, проект «Родная анимация»-йы сæргълæууæг, ирон федерацийы минæвар: «Культурон хъæппæристы фонды руаджы бацархайдтам. Ацы студи нæ къухы бафтыд æмæ цы ратæлмац кодтам, уыцы мультипликацион кинонывтæ фонды руаджы скодтам. Тæлмац фылдæр кæны Гуыриаты Ларисæ, фæлæ ма йæм фæкæсынц Касаты Аслæнбег, Пагæты Фатимæ æмæ æндæр филологтæ».
Кæй зæгъын æй хъæуы, мультипликацион кинотæ ирон æвзагмæ тæлмац кæнын райдыдтой 90-æм азты дæр. Фæлæ цæмæй мадæлон æвзагыл мультфильмтæ парахат кæнын уа, уый тыххæй хъуыдис лицензи. Ныр ирон федерацийы минæвæрттæ авторæй тæлмац кæныны бар райсынц, хъæугæ гæххæттытæ бафыссынц æмæ кусын райдайынц.
Абоны онг ирон федерацийы минæвæрттæ бакодтой ахадгæ куыст. Лицензийы бындурыл ратæлмац кодтой «Фиксиктæй» 5 серийы, «Машæ æмæ арс»-ы дыууæ сезоны, «Æртæ богалы æмæ Мысыры æхсин». Ныр архайынц «Лео æмæ Тиг»-ыл. Алы мультипликацион кинойæн дæр вæййы йæхи кастинг, ома алкæмæн дæр вæййы йæхи актертæ. Зæгъæм, «Лео æмæ Тиг» тæлмац кæндзысты ирон театры актертæ. Вæййы ма афтæ дæр, æмæ цадæр ролы фæхъазы уыцы иу адæймаг
Цъæхилты Чермен, мультипликацион кино «Æртæ богалы æмæ Мысыры æхсин»-ы фæлхат кодта бæх Юлийы: «Нæ куыст иуæй уыд æнцон, уымæн æмæ мæ зæрдæмæ цæуы. Кодтой зæрдиаг куыст. Нæ рæстæг хъæлдзæгæй арвыстам. Нæ куыст кодтам сыгъдæгзæрдæйæ, уымæн æмæ уыд сывæллæттæн. Фæлæ нын уыд зындзинæдтæ дæр. Зæгъæм, уырыссаг æвзагыл мидис равдисынæн 2-3 дзырды кæм хъуыд, уым иронау уыдысты 6 æмæ уымæ гæсгæ хъуыдис гыццыл рæвдздæр дзурын. Сывæллон мультфильммæ куы кæса, уæд уыдз æмæ иронау уа».
Фидæнмæ сæвæрдтой бирæ нысæнттæ, уымæн æмæ сывæллæттæ ныртæккæ фылдæр информацион технологитæй пайда кæнынц, æмæ хуыздæр уыдзæн, уым дæр мадæлон æвзаг куы хъусой, уæд – зæгъынц ирон федерацийы минæвæрттæ. Кæй зæгъын æй хъæуы, лицензийы бындурыл бæрнондæр куыст кæнын хъæуы æмæ ныр студийы уыцы куыст уыдзæн хуыздæр.
