Ахæм удæнцойдзинадæн аргъ скодтой фыццаг бæлццæттæ
Пермæй Дзæуджыхъæумæ. Аэропорт «Дзæуджыхъæу»-ы фæзынд ног комкоммæ рейс. Ахæм удæнцойдзинадæн аргъ скодтой фыццаг бæлццæттæ. Уæвгæ, аэропорты куысты ма хæстæгдæр фидæны фæзындзæн ахсджиаг ногдзинæдтæ. Бæлвырддæр хабæрттæ радзурдзæн Хъайтмазты Дзерассæ.
Пермæй уæлдæфон наутыл Дзæуджыхъæу нырма не *мбæлыд. Ног уæлдæфон къæлидор цы хæдтæхæг байгом кодта, ууыл Цæгат Ирыстоны традицимæ гæсгæ сæмбæлдысты доны аркæйæ. Пермæй Дзæуджыхъæумæ ныр ис 3 сахаты æмæ *рдæгмæ схæццæ уæвын. Уыимæ комкоммæ рейсæй. Фыццаг бæлцæттæ бæрзонд аргъ скодтой ахæм ногдзинадæн.
Аэропорты куысты чысыл ногдзинæдтæ нæ фæзындзæн. Фæззæджы байгом уыдзæн ног терминал.
Дыууæуæладзыгон бæстыхай æххæст уыдзæн хуыздæр технологитæй. Се *хсæн – нырыккон бæлвырдгæнæн æмæ багаждæттæн системæтæ, лифттæ.
Ног терминалы уавæртæ уыдзысты хуыздæр. Уадзæн гæнæнтæ 2 хатты фæфылдæр уыдзысты, сахатмæ лæггад кæндзæн 320 адæймагæн. Уыдзæн цалдæр регистрацигæнæн тæрхæджы æмæ сæйрагдæр та – телескопон трап. Уый аэропорты бæстыхайы æмæ хæдтæхæджы *хсæн æххæст кæндзæн комкоммæ бастдзинад. Ахæм фадат нæй Цæгат Кавказы иу аэропорты дæр.
Ног терминалы фасад у хæхты хуызы, йæ цары бын дæр сæвæрдзысты Кавказы бæрзæндты хуызы рухсытæ. Фæндтæм гæсгæ, ног терминал лæггад кæндзæн хæдтæхджытæн, зæронд бæстыхайæ скæндзысты административон.
Хæстæгдæр рæстæг аэропорт фæнд кæны йæ географи фæпарахæтдæр кæнын. Гæнæн ис, æмæ фæзындзысты рейсытæ Уæрæсейы кæцыдæр горæттæм, стæй Бакумæ æмæ Ереванмæ.
