Буары тæвд куы схиза, дæхи лæмæгъ куы нкъарай, зæрдæйы куыст куы фæива æмæ ма сæры рыст дæр куы фæзына, уæд уыцы миниуджытæ дзурæг сты, хур дæ кæй ныццавта, ууыл
Цæгат Ирыстоны æнæнхъæлæджы уавæрты министрады специалисттæ ногæй сидынц адæммæ, цæмæй уой къæрцъхъусдæр, боныхъæд цæхгæр кæй ивдзæн, уый тыххæй. Ранæй-рæтты æрцæудзысты тæрккъæвдатæ, дымгæ æмæ ихимæ. Фæлæ уал тынг тæвд бонтæ тыхсын кæнынц республикæйы цæрджыты. Хицæн районты термометр схæццæ 38 градусы онг. Цæмæй боны ахаст æнæниздзинадæн къаддæр зиан хæсса, уый тыххæй хи куыд дарын хъæуы? Ацы фарстæн бæлвырд дзуапп ратдзæн Фидараты Маринæ.
Буары тæвд куы схиза, дæхи лæмæгъ куы нкъарай, зæрдæйы куыст куы фæива æмæ ма сæры рыст дæр куы фæзына, уæд уыцы миниуджытæ дзурæг сты, хур дæ кæй ныццавта, ууыл. Фыццаджыдæр тынг тæвд боныхъæд сæхиуыл банкъарынц, йæ туджы æлхъывдад бæрзонд кæнæ æгæр ныллæг кæмæн вæййы, стæй ма æндæр низтæ кæмæ вæййы, ахæм адæм.
Цæмæй хуры тынты æппæрццæг миниуджытæ ма банкъарай, уый тыххæй ахсджиаг у хуымæтæг амынддзинæдтæ æххæст кæнын. Сихор афон хурмæ ма цæуын, бирæ дон нуазын, рог æмæ æнцондарæн дзаумæттæ дарын. Уæвгæ, алчидæр йæхицæн равзары ирвæзынгæнæн æмæ хи хъахъхъæнæн мадзæлттæ.
Тæвдæй тынг тыхсынц цæрæгойтæ дæр. Уæлдай тынгдæр хуры знæт сæхиуыл банкъарынц хъæддаг æмæ экзотикон сырдтæ. Сырддоны кусджытæ архайынц æмбæлгæ уавæртæ аразыныл. Суанг ма сыл дон дæр фæкалынц, вольертæ ныууазал кæнынц.
Синоптикты ныхæстæм гæсгæ ацы азы сæрд, фаронимæ абаргæйæ, ахæм тæвд нæу. Фæлæ уый нæ хынцгæйæ, уæддæр æнтæф бонтæ батыхсын кæнынц се ппæты дæр. Хæстæгдæр бонты уавæр аивдзæн. Гидрометцентры специалистты ныхæстæм гæсгæ уæлдæфы температурæ фæныллæгдæр уыдзæн.
Цæгат Ирыстоны æнæнхъæлæджы уавæрты министрады специалисттæ куыд хъусын кæнынц, афтæмæй хæстæгдæр бонты хицæн районты æрцæудзысты тæрккъæвдатæ, тыхджын дымгæ æмæ ихимæ. Хи хъахъхъæнын хъæуы алы боныхъæды дæр.
