Куыстытæ дзы цæуынц, паддзахадон программæ «Ахуырады рæзт» æххæст кæнгæйæ
Хицауады сæрдар Дзанайты Барис федта, республикæйы физикон-математикон лицей-интернаты æмæ 4-æм гимназы бындурон цалцæг куыд цæуы, уый. Куыстытæ дзы цæуынц, паддзахадон программæ «Ахуырады рæзт» æххæст кæнгæйæ. Премьеримæ кусæг балцы уыдысты ахуырады æмæ наукæйы министр Алыбекты Эллæ стæй арæзтады æмæ архитектурæйы министр Моргуаты Константин. Иумæ федтой кълæстæ, актон залтæ æмæ пъадвалтæ. Ныртæккæ объекттæ цалцæг цæуынц пъланмæ гæсгæ. Куыстытæ æххæстгонд æрцыдысты 70%-æй фылæр. Подрядон организаци ныридæгæн бакодта рацарæзты куыстытæ, сцалцæг кодта бæстыхайы сæр æмæ æддаг бакаст. Цæуынц ма дзы электромонтажгæнæн æмæ аивгæнæн куыстытæ. Ивынц дондзæуæнтæ, пъолтæ, къæйдуртæ. Дзанайты Барис подрядон организацийы ргом аздæхта, объект эксплуатацийы раттыны æмгъуыдмæ æмæ куыстыты хæрзхъæддзинадмæ. Хъуамæ 1-æм сентябрьмæ лицей уа цæттæ. Дзæуджыхъæуы 4-æм гимназы та куыстытæ цæуынц дыууæ къæпхæнæй. Эксплуатацийы сæ ратдзысты 22-æм æмæ 23-æм азты. Бындурон цалцæг бацыд йæ тæмæны. Æппæт 3 уæладзыджы æмæ æддаг бакаст æххæстæй баивдзысты. Уымæй дарддæр специалисттæ ивынц инженерон хызтæ æмæ хæринаггæнæн блок. Сæйрагдæр фарста – сывæллæтты æдасдзинад, – загъта Дзанайты Барис. Гимназы директор Цуциты Сослан фехъусын кодта, ахуыргæнæндоны кæй сног кодтой зынгсирвæзты ныхмæ системæ. Уæ зæрдыл уын æрлæууын кæндзыстæм, æдæппæтæй 2022-æм 23-æм азты нысан кæнынц республикæйы 66 скъолайы сцалцæг кæнын.
