Æрмæст сæ хъæуы фæндаджы сæрты ахизын
Поселок Молодежныйы цæрджытæ Джызæлмæ фистæгæй машинæйæ тагъддæр бахауынц. Æрмæст сæ хъæуы фæндаджы сæрты ахизын. Машинæйæ та уыцы уаццаг у 8 километры онг. Уый уымæн, æмæ сæ иугæнæг фæндаг афтæ дæр арæзт не *рцыд.
Поселок Молодежныйæ Джызæлмæ æнцон бахауæн у. Хъæуы æрмæст фæндаджы сæрты ахизын. Фæлæ, цæмæй хъæумæ машинæйыл ацæуай, уый тыххæй уал хъæуы Дзæуджыхъæумæ ссæуын, федералон трассæйыл 8 километры ацæугæйæ. Ахæм маршрутыл поселочы цæрджытæ ахуыр сты.
Цалынмæ поселок Молодежныйы цæрджытæ ахæм маршрутыл цæуынц, уæдмæ 2 хъæуы цы фæндаг хъуамæ баиу кодтаид, уый схæмпæл ис. Йæ иу хай та ма суанг уæйгонд дæр æрцыд. Йæ хицау Кочынаты Олег зæхх балхæдта 2014-æм азы, сбетон æй кодта, цæмæй уый фæстæ ацы бынаты йæ бизнесы куыст кæна. Æмæ кæд финансон хæрдзтæ баййафа, уæддæр цæттæ у фæндаг бауадзынæн зæххы 6 метры раттын.
Поселочы нæй социалон объекттæ. Хæстæгдæр скъола, сывæллæтты рæвдауæндон æмæ ма суанг дукани дæр сты Джызæлы. Уырдæм цæуын бирæ нæ хъæуы, фæлæ у тæссаг. Фистæгæйцæуджытæн ахизæн ис æрмæст æртæфарсон тигъыл. Уымæ бахæццæ уæвын дæр æнцон нæу фæндаджы кæрæтты, уымæн æмæ дзы лæууынц уæзласæн машинæтæ.
Уавæр сбæлвырд кæныныл архайынц адæмон фронты активисттæ. Цæрджытæ куыд радзырдтой, афтæмæй поселочы проектмæ гæсгæ хъуамæ уыдаид ифтонггонд цыппарфарсон тигъ. Фæлæ арæзтадон организаци йæ хæстæ нæ сæххæст кодта. Фæндаг бауадзын æмæ тигъ сифтонг кæнын ныртæккæ ис æрмæст федералон профилон ведомствæйы разыдзинадæй.
Поселочы арæзтад фæцис 2007-æм азы программæ «Доступное жилье для молодой семьи»-мæ гæсгæ. Ныр ма хъæуы банхъæлмæ кæсын ацы фæндагæй пайда кæныны фадат дæр кæд фæзындзæн, уымæ.
