Сæ хъаст сæм бахастой Дзæуджыхъæуы цæрджытæ
Адæмон фронты активисттæ сбæлвырд кодтой, дзуттæгты уæлмæрд кæй хонынц, уый уавæр. Сæ хъаст сæм бахастой Дзæуджыхъæуы цæрджытæ. Къæвдаты рæстæг бынат байдзаг вæййы донæй æмæ канализацион чъизитæй. Уавæр сраст кæныны курдиатимæ адæм сидтысты горæты администрацимæ дæр
Дзæуджыхъæуы дзуттаг уæлмæрдтæ кæй хонынц, уым ахæм уавæр вæййы къæвдаты рæстæг. Тогызты Гæлинæйæн ам йæ ныййарджытæ ныгæд сты. 30 азы сылгоймаг цæуы алы бæрнон куыстуæттæм, ацы фарста алыг кæныны курдиатимæ. Ныртæккæ æххуысмæ фæсидт адæмон фронтмæ.
Уæлмæрдтæ кæм сты, уыцы уынг бынноз у. Къæвдаты сезон дон ардæм фембырд кæны Сапицкæйырдыгæй, Шмулевичы уынгæй электрон колледжы территорийыуылты. Ахуыргæнæндон æмæ уæлмæрдты *хсæн цы быру ис, уый дон нæ уромы. Фæлæ уæлмæрдтæм æрмæст къæвдадон нæ хæццæ кæны. Уый ныккæлы канализацион люктæм, æмæ уырдыгæй чъизитæ уæлæмæ ссæуынц.
Мардæвæрæн бюройы директоры хæдивæг Тадтаты Василий хорз зоны, къæвдаты рæстæг куыстуаты территоримæ цæуын нæ хъæуы – байдзаг вæййы канализацийы хауæтдзæгтæй. Колледжы раз æнæкусгæ донæмбырдгæнæн куы ссардтой, уæд æм базылдысты. Уавæр чысыл фæхуыздæр, фæлæ фарста кæронмæ нæ алыг. Василий дæр æххуысмæ фæсидт горæты администрацимæ.
Иноверческий кæнæ Дзуттаг уæлмæрдтæ фæзындысты 1880-æм азы. Ам 10 мин ингæнæй фылдæр ис. Уæлмæрдты раз æрæджы сæвæрдтой асфальт, фæлæ донæмбырдгæнæн канализаци афтæ дæр нæ фæзынд.
Адæмон фронты минæвæрттæ ма администрацимæ арвитдзысты курдиат, люктæй цæмæй канализацион чъизитæ мауал кæлой, ууыл бакусын.
