Дзæуджыхъæуы стыр уынджы сæ курдиат лæвар кæнынц æрыгон зарæггæнджытæ æмæ музыканттæ
Сæрды фæстаг мæй республикæйы цæрджыты зæрдæтæ рухс кæны цымыдисаг проект «Музыкалон проспект». Дзæуджыхъæуы стыр уынджы сæ курдиат лæвар кæнынц æрыгон зарæггæнджытæ æмæ музыканттæ. Горæты цæрджытæ æмæ уазджытæ та æхсызгонæй райсынц рæсугъд æмæ ирд æнкъарæнтæ.
Хуырымты Дмитрийы зард уæлдай тынгдæр сабиты зæрдæмæ фæцыд. Чысыл аивадуарзджытимæ æмархайд кæнын Дмитрийæн æнцон у, уымæн æмæ разамынд дæтты сывæллæтты вокалон-инструменталон ансамблæн. Ныр йæ сценæ у – Сабырдзинады проспект, йæ курдиатæн аргъгæнджытæ та сты, музыкæйы зæлтæ кæй æрлæууын кодтой, уыцы адæм.
Акци «Музыкалон проспект» сæмбырд кодта 40 музыкантæй фылдæры. Се *хсæн куыд фæлтæрдджын дæснытæ, афтæ сфæлдыстады фыццаг къахдзæфтæ чи кæны, уыдон дæр. Адæмон музыкæ, рок, джаз. Кусынц алы жанрты.
Дзæуджыхъæуы культурæйы управленийы ахæм хатдзæгмæ æнхъæлмæ кастысты. Проекты авторты ныхæстæм гæсгæ, сæ фæндыд, горæты цæрджыты æмæ уазджыты зæрдæмæ чи фæцæуа, ахæм сæрмагонд атмосферæ саразын.
Æмæ уый сæ къухы бафтыд. Музыкалон проспект сси адæмы иугæнæн бынат. Музыкалон проект ахæсдзæн августы кæронмæ.
