Уый фæрцы ахуыргæнджытæн фадат вæййы сæ фæлтæрддзинад фæфылдæр кæнынæн æмæ ног зонындзинæдтæ райсынæн
Нæ республикæ дыккаг аз архайы конкурс «Мастер года»-йы. Уый фæрцы ахуыргæнджытæн фадат вæййы сæ фæлтæрддзинад фæфылдæр кæнынæн æмæ ног зонындзинæдтæ райсынæн. Ацы аз нæ республикæйæ минæвар уыдзæн Цæгат Ирыстоны паддзахадон базарадон – экономикон колледжы сæрмагонд дисциплинæты ахуыргæнæг Цæболты Зæлинæ.
Цæмæй УФ-йы ахуыргæнджыты уавæртæ фæхуыздæр уой, уый тыххæй арæзт цæуынц бирæ мадзæлттæ. Уыцы мадзæлттæй иу у конкурс «Мастер года». Нæ республикæйы минæвæрттæ дзы архайынц дыккаг аз. Цæболты Зæлинæ Цæгат Ирыстоны паддзахадон базарадон-экономикон колледжы кусы 2 азы. Фарон куы федта, йе мкусæг конкурсы куыд архайы, уый, уæд æй бафæндыд йæхи бафæлварын. Æмæ йын бантыст. Ныр у регионалон къæпхæны уæлахиздзау.
Зæлинæ йæ сабибонтæй фæстæмæ зыдта, ахуыргæнæг кæй уыдзæн, уый, æмæ йын дæсныйад равзарыны рæстæг куы рцыд, уæд дыууæйыл нал уыд, Цæгат Ирыстоны паддзахадон институты студент кæй суыдзæн, уый. Конкурсы архайгæйæ йæ хъуыд 3 къæпхæны ацæуын.
Кæд конкурсмæ сæ курдиаттæ балæвæрдтой 2 мин æмæ 798 адæймаджы, уæд финалмæ бахаудтой æрмæстæр 85. Арæзт æрцæудзæн Екатеринбурджы. Уыдзæн дзы 3 хæслæвæрды. Зæлинæ йæ зæрдæ дары, кæй рамбулдзæн, ууыл. Фæлæ кæд уæлахиздзау нæ уа, уæддæр иннæ аз нæ республикæйы минæварæн бацамондзæн ныр цы ног зонындзинæдтæ райса, уыдон.
Финалы кæд 85 адæймаджы архайдзысты, уæддæр сæ равзарын хъæудзæн хуыздæрты. Уыцы хыгъдмæ бацæудзысты æрмæстдæр 10 адæймаджы. Уæдæ сæрмагонд приз – 1 милуан сомы та райсдзæн фыццаг бынаты хицау.
Конкурсы архайдтой ахуыргæнджытæ республикæйы æппæт колледжтæй. Ныр æппæтуæрæсеон къæпхæн цæудзæн 28 сентябрæй 4 октябрмæ. Архайдзысты дзы Уæрæсейы æппæт субъекттæй 85 ахуыргæнæджы.
