Райдыдта знон 9 сахаты æмæ 15 минутыл, террористтæ скъола куы бацахстой, æмæ адæм фыццаг æхстытæ куы фехъуыстой, уыцы рæстæг
18 азы чи нæ мынæг кæны, уыцы рыст. 3 боны Беслæны цæуы номарæн вахтæ. Райдыдта знон 9 сахаты æмæ 15 минутыл, террористтæ скъола куы бацахстой, æмæ адæм фыццаг æхстытæ куы фехъуыстой, уыцы рæстæг. Æмæ та ногæй мемориалмæ цæуынц сæдæгай адæмтæ. Хæссынц дидинджытæ æмæ дон. Номарæн вахтæйы фыццаг бон изæры Беслæны скъолайы кæрты ссыгътой 334 цырагъы. Уыйбæрц царды аскъуыд уыцы æнамонд бон. Æппæт дуне чи сæнкъуысын кодта, уыцы рыстæн ферох кæнæн нæй.
Беслæны фыццæгæм скъолайы мысынц 2004 азы æвирхъау цаутæ. Ног ахуыры азы фыццаг дзæнгæрæг æмæ рæсугъд уæлæдарæс. Цæсты фæныкъуылдмæ циндзинад раивта цæстысыгтæм. Ныр 18-æм аз Беслæны спортивон залы æрæмбырд вæййынц адæм, семæ æрбахæссынц, 3 боны адæмæн цы нæ фаг кодта, уый – дон. 2004 азæй фæстæмæ алы фыццæгæм сентябры дæр адæм минут æдзæмæй алæууынц, дзуары цур сæвæрынц дидинджытæ.
Трагеди канд хъуыды кæнын нæ, фæлæ ма йæ кæстæр фæлтæрæн дæр дзурын хъæуы. Тедтаты Лилия у Цæгат Ирыстоны паддзахадон базарадон – экономикон колледжы ахуыргæнæг. Йемæ æрбакодта студентты. Уыдонæй иуæй – иутæ райгуырдысты 2004 азы фæстæ, фæлæ педагогтæ куыд зæгъынц, афтæмæй ахсджиаг у уыцы цауты тыххæй зонын æмæ дзурын.
Ацы трагеди канд Беслæны æмæ Цæгат Ирыстоны нæу, фæлæ æппæт дунейы дæр. Æрвылаз ардæм æрбацæуынц алы бæстæтæй адæм. Ахæм æвирхъау хабæрттæ фехъусын – уый иу, фæлæ сæ дæхи цæстытæй куы фенай, уæд уæлдай тынгдæр банкъары адæймаг, 3 боны сывæллæттæ цы тухæнтæ кодтой, уый.
Беслæны трагеди сæнкъуысын кодта æппæт дунейы цæрджыты дæр. 18 азы фæстæ фыццæгæм скъола фенынмæ æрбацыдысты Италийы делегацийы уæнгтæ дæр. Зæгъын ма хъæуы уый дæр, æмæ Республикæ Сан – Маринойы астæу ис Беслæны амæттæгтæн цыртдзæвæн. Сан – Маринойы æмæ Италийы цæрæг, зындгонд флейтистка Моника Моррони æрвылаз æрбацæуы Беслæнмæ.
Беслæны æвирхъау хабар ныр зондзысты æмæ йæ фидæны фæлтæртæм хæццæ кæндзысты æнусты дæргъы. Ацы 3 боны Беслæнмæ цы адæм цæуой, уыдонæн лæггад кæндзысты волонтертæ – медиктæ.
3 боны аивтой мингай адæмы цард. Адæймаджы уырнгæ дæр нæ кæны, ацы спортивон зал 18 азы размæ хæцæнгарзтæй æмæ рæмудзæнтæй дзаг кæй уыд, уый. Рæстæг цæуы, фæлæ уыцы цаутæн рох кæнæн нæй. Изæрæй скъолайы кæрты теракты амæттæгты номыл традицимæ гæсгæ ссыгътой цырæгътæ. Фæлæ кæд цырагъ басуддзæн, уæддæр уыцы уæззау хабары цæхæр рох никуы уыдзæн, æмæ цæрдзæн ирон адæмы зæрдæты.
