Ивддзинæдтæ баст уыдзысты цалдæр æхсæнадон къабазимæ
Ацы мæйы райдианæй нæ бæстæ цæрын райдыдта ног закъонтæм гæсгæ. Ивддзинæдтæ баст уыдзысты цалдæр æхсæнадон къабазимæ. Бæлвырддæр та афтæ: социалон æххуысы ног мадзæлттæ лæвæрд цæудзысты æнæ гæххæтт бадæтгæйæ. Куысты ныллæууыны фадат уыдзæн паддзахадон лæггæдты порталы уылты. Куыстуаты разамонæг, кусæг æмæ куыст чи агуры, уыдоны нымæцон къухфыст райсгæйæ, æмæ æмбæлгæ гæххæттытæ порталмæ бахæсгæйæ. Уымæй дарддæр сентябрæй фæстæмæ, Уæрæсейы цæрджытæ исты куы лхæной, уæлдайдæр та интернеты уылты, уæд сæхи тыххæй бæрæггæнæнтæ æнæмæнг хъусын кæнын нал хъæудзæн. Уыимæ уæйгæнæг кæнæ куыстуат та æнæмæнг хъуамæ равдиса йæ товар кæнæ лæггæдтæ. Уыцы домæн куы не ххæст кæной, уæд сæ бахъæудзæн ивар бафидын 50 мин сомы. Уæдæ ивынц автоскъолаты программæтæ дæр. Фæфылдæр уыдзысты тренировкæтæгæнæн сахæттæ, куыд сæрмагонд фæзты, афтæ горæты уынгты дæр. Стæй ма ахæм ногдзинад. Зæгъæм, адæймагмæ ис машинæ скъæрыны бардæттæг æвдисæндар æрмæст иу категорийы, æмæ йæ фæнды иннæ категори дæр райсын, уæд ын уыцы гæнæн уыдзæн æнцондæр схемæмæ гæсгæ. Ивддзинæдтæ хаст æрцыдысты транспорты техникон æркасты домæнтæм дæр. Шофырты нал хъæудзæн семæ аптечкæ, аварион нысан æмæ зынгхуыссынгæнæн ласын.
Хæдзæрттæн разамынддæттæг компани æвзаргæйæ, хъæудзæн бирæфатерон хæдзары цæрджыты 50 % разыйы дзуапп райсын. Раздæр та уыд 25%. Фатер дих кæнгæйæ та алы адæймагмæ дæр хауы 6 квадратон метры. Чырæ телефонты дæр ногдзинад. Алкæцыйы дæр уыдзæн æфтуанты уæрæсейаг дукани. 1, 2 æмæ 3-æм къæпхæны æппæт инвалидтæн сæ бон уыдзæн дыккаг уæлдæр ахуырад райсын, уыимæ лæвар. Уæлдай фылдæр ивддзинæдтæ та хаст æрцыд ахуырады тыххæй уæрæсейаг закъонмæ.
