Ныхас кодтой республикæйы коммуналон комплексы куыстуæтты финансон-хæдзарадон архайды анализыл æмæ экономикон рæзтыл
Премьер Дзанайты Барисы разамындæй арæзт æрцыд сæрмагонд æмбырд. Ныхас кодтой республикæйы коммуналон комплексы куыстуæтты финансон-хæдзарадон архайды анализыл æмæ экономикон рæзтыл. Ацы азы райдианæй энергересурсты хæрдзты тыххæй бæстон докладтæ скодтой куыстуат «Газпром межрегионгаз Владикавказ»-ы генералон директор Хъодзаты Алан æмæ акционерон æхсæнад «Россети СК»-«Севкавказэнерго»-йы филиалы директоры хæдивæг Артур Хурсинов. Æмтгæй райсгæйæ, специалистты бæрæггæнæнтæм гæсгæ, газæн фиддонты уавæр у рæстæмбис. Фæлæ ма ис цалдæр ахсджиаг фарстайы Кировы æмæ Дыгуры районты. Ацы азы 6 мæймæ зынгæ фæкъаддæр сты электрон тыхæн фиддонтæ. Муниципалитетты территориты ис лыггæнинаг фарстатæ, æмæ сæ хъæуы æвæвстиатæй лыг кæнын. Районты сæргълæуджытæ хъуамæ тырной, цæмæй коммуналон фиддонтæ фыст цæуой 100% онг, æмæ хæстæ ма æмбырд кæной, – загъта Дзанайты Барис. Æмбырды ма ныхас цыд бирæфатерон хæдзæртты бындурон цалцæджы фиддонтыл дæр. Фæстаг 3 азмæ ацы лæггадæн адæм фылдæр фидын райдыдтой. Фæлæ ма уæддæр кусинæгтæ ис. Нæ сæйраг хæс у – республикæйы цæрджыты æнцонвадат уавæртæ, – бахынцта Цæгат Ирыстоны премьер.
