Æххуыс кæны, мобилизацийы чи архайы, уыцы æфсæддонтæн æмæ сæ бинонтæн
Цæгат Ирыстоны кусы колл-центр. Æххуыс кæны, мобилизацийы чи архайы, уыцы æфсæддонтæн æмæ сæ бинонтæн. Афтæмæй республикæйы цæрджытæ исынц социалон, психологон æмæ юридикон æххуыс. Центры 12 волонтеры кæнынц ахадгæ куыст. Хæдзæрттæм баласынц хойраджы продукттæ æмæ медицинон препараттæ. Уымæй дарддæр бафснайынц æмæ базилынц хæдзæрттæм. Курдиæттæ вæййынц алыхуызон, æмæ иу дæр æнæ дзуаппæй нæ баззайы. Колл-центры куысты тыххæй бæстондæр радзурдзæн Тъехты Элинæ.
Икъоты Лянæйы фырт мобилизацигонд æрцыд 3 къуырийы размæ, æмæ йын æххуысгæнæг нал уыд. Уæд æм баххуыс кæнынмæ æрцыдысты волонтертæ: кæрты цы кæрдæг уыд, уый ныккарстой, стæй бафснайдтой хæдзæрттæ.
Волонтертæ куыд зæгъынц, афтæмæй сæм æххуысагуыр бадзурынц алыхуызон адæм. Колл – центрмæ бадзырдта Æрыдоны цæрæг. Йæ фыртмæ йын фæсидтысты æфсадмæ. Сылгоймаг куры, цæмæй йын баххуыс кæной йæ хæдзары сæр баивынмæ, уымæн æмæ уарынты рæстæг æм ныхъхъары дон. Хъæугæ кусæнгæрзтæ балхæнынмæ йæм фæкастысты районы администрацийы.
Адæмæн алывæрсыг æххуыс фæкæнынц 12 волонтеры. Балхæнынц хойрæгтæ æмæ хостæ, бафснайынц хæдзар. Баххуыс кæндзысты алкæмæн дæр. Хъæуы æрмæстдæр мобилизацигонд хиуæтты колл – центры курдиат ныууадзын. Волонтертæ ацæуынц сæрмагонд ахуыртæ. Уæлдай ахсджиагæй æркæсынц курдиаттæм. Æрбацæуынц республикæйы æппæт районтæй. Æппæтæй фылдæр та Дзæуджыхъæуæй.
Адæмæн сæ бон канд социалон æмæ психологон æххуыс райсын нæу, фæлæ ма юридикон дæр. Колл – центры кусынц, телефонæй консультаци чи кæны, ахæм специалисттæ.
Колл – центры номыр уынут уæ экранты. 77-62-67. Бадзурæн сæм ис райсомы 8 сахатæй изæры 8 сахатмæ.
