Чиныг рауадзын бантыст, форум «Машук»-ы цы грант рамбылдтой, уый фæрцы
Рухс федта Нарты кадджыты ног рауагъд. Хъæппæрисы атвор у Илурты Хъазыбег. Иллюстрацитæ та йын скодта Уæрæсейы сгуыхт нывгæнæг Цæллагты Виктор. Чиныг рауадзын бантыст, форум «Машук»-ы цы грант рамбылдтой, уый фæрцы. Уымæй дарддæр ма баххуыс кодтой спонсортæ дæр, æмæ ныммыхуыр кодтой 300 экземпляры. Се ппæт дæр балæвар кодтой скъолатæн, сидзæр сывæллæтты хæдзæрттæн æмæ районты библиотекæтæн. Ацы хатт чиныг хицæн кæны уымæй, æмæ алы таурæгъ дæр фыст у ирон æмæ уырыссаг æвзагыл. Нысан ма кæнынц ноджыдæр 6 чиныджы рауадзын. Афтæмæй циклы æдæппæтæй уыдзæн 7 чиныджы. Илурты Хъазыбеджы ныхæстæм гæсгæ, нарты кадджыты ис арф философон хъуыды. Уымæ гæсгæ йæ ахуыр кæнын кæддæриддæр у актуалон. Ацы рауагъд пайда уыдзæн куыд сывæллæттæн, афтæ хистæртæн дæр. Чиныгæй дарддæр ма нысан кæнынц æндæр мадзæлттæ дæр æххæст кæнын. Се хсæн – Нарты кадджыты тыххæй лекцитæ æмæ скъоладзаутимæ фембæлдтытæ.
