Иумæйаг грант райстой милуан æмæ 2 сæдæ мин сомæн
Фæсивæдæн гæнæнтæ. Чеджемты Надеждæ æмæ Сырхауты Кристинæ систы фæсивæдон проектты æппæтуæрæсеон конкурсы уæлахиздзаутæ. Иумæйаг грант райстой милуан æмæ 2 сæдæ мин сомæн. Сæ дыууæйы хъæппæристæ дæр сты хъæугæ æмæ æмбал кæмæн нæй, ахæмтæ. Чызджыты проекттæ царды æххæстгонд цæудзысты афæдзы дæргъы. Конкурсы уæлахиздзаутимæ фембæлд не сфæлдыстадон къорд дæр, æмæ ныхасы бар Тъехты Элинæйæн.
Цæттæ проектыл дзурын нырма раджы у. Чеджемты Надеждæ йæм нырма æрæджы бавнæлдта, фæлæ ныр дæр уыны, фидæны æнтыстджын кæй уыдзæн, уый. «Æрыгон архитектортæ æмæ урбанистты фæсивæдон ахуырадон форум регионты хсæн». Фыццаджыдæр арæзт у архайджыты аивадон дæсныйад раргом кæнынмæ æмæ цы регионты цæрынц, уыдоны рæсугъддзинады райрæзты тыххæй.
Надеждæ куыд зæгъы, афтæмæй форум скæнын зын у. Архайджытæм фæсидын, ссарын бынат æмæ бакусын алы лыстæг детальтыл. Фæлæ уæддæр чызг йæ куыст уарзы. Йæ царды ай у дыккаг грант. Куыд зæгъы, афтæмæй конкурсы уæлахиздзау кæй сси, уый йын бакодта ног фадæттæ.
Æппæт Уæрæсеон фæсивæдон проектты конкурсы уæлахиздзау сси Сурхауты Кристинæ дæр. Грантæй цы фæрæзтæ райса, уыдонæй сараздзæн литературон видеоканал. Уыдзæн дзы национ литературон уацмысты видеопрезентацитæ.
Чызгмæ уыцы хъуыды фæзынд, канд чингуытæ кæсын бирæ кæй уарзы, уый тыххæй нæ, фæлæ уымæй фылдæр та йæ Райгуырæн Бæстæ кæй уарзы, уый тыххæй дæр. Ныр ахуыр кæны æмæ цæры Мæскуыйы. Ирыстон æмæ йæ фидæн чызджы хъуыдыты вæййынц алкæддæр. Йæ проект фыццаджыдæр арæзт у нæ адæмы традицитæ æмæ æгъдæуттæ бахъахъхъæныныл.
