Разамынд дæтты бæстæйы стырдæр медиахолдинг Æппæтуæрæсеон паддзахадон телерадиокомпанийы регионалон департаментæн
Телеуынынады æппæтдунеон бон телерадиокомпани «Алани» бабæрæг кодта медиаменеджер æмæ æхсæнадон архайæг Рифат Сабитов. Разамынд дæтты бæстæйы стырдæр медиахолдинг Æппæтуæрæсеон паддзахадон телерадиокомпанийы регионалон департаментæн. Генералон директоры хæдивæг федта Ирон Къуыбырыл студийы модернизаци, базонгæ каналтæ «Россия 1» æмæ «Россия 24″-йыл цы ног программæтæ ис, уыдонимæ. Бæлвырддæр хабæрттæ радзурдзæн Хъайтмазты Дзерассæ.
Телеуынынады æппæтдунеон боныл Рифат Сабитов сæмбæлд Цæгат Ирыстоны – республикæйы рагондæр телестудийы Ирон Къуыбырыл. Йæ балц официалон у, фæлæ уал раздæр медиаменеджер æмæ æхсæнадон архайæг федта, 11 азы размæ ам йæхæдæг цы бал бæлас ныссагъдта, уый. Дæтты дыргътæ. Æппæтуæрæсеон паддзахадон телерадиокомпанийы генералон директоры хæдивæг, регионалон департаменты разамонæг базонгæ телеуынынады студийы модернизациимæ. Ацы историон бæстыхайы фæнд кæнынц цалцæггæнæн куыстытæ сæххæст кæнын æмæ информацион æмæ тематикон програмæттæн цалдæр исæн фæзы саразын. Ног студийы проект равдыста телерадиокомпани «Алани»-йы директор Хъуысаты Тимур.
Сæрмагонд проектты службæйы Рифат Сабитовæн равдыстой ног проекттæ. Эфиры вæййынц каналтæ «Россия 1» æмæ «Россия 24»-йы Цæгат Ирыстоны мыхуыры æмæ дзыллон коммуникациты комитеты паддзахадон заказмæ гæсгæ. Проект «Туда-обратно» у, Ирыстонæй чи ацыд, фæлæ йæ райгуырæн зæхх чи уарзы, уыцы адæмы тыххæй. Фыдыбæстæйæ дард уæвгæйæ дæр ын лæггад кæнынц. Проект «Тонкости» – лыстæг хъуыддæгтæм лæмбынæг чи кæсы, уыцы адæмæн энциклопеди. Æмæ «Местное время. Суббота» – æвдисы фæлладуадзæн боны райсом хъæлдзæгæй æмæ пайдаимæ кæй ис арвитæн телерадиокомпани «Алани»-йы командæимæ.
Рифат Сабитов ма лæууы Уæрæсейы Æхсæнадон палатæйы информацион æмбаладты райрæзты, дзыллон информацийы фæрæзты æмæ дзыллон коммуникациты къамисы сæргъы. Республикæйы Æхсæнадон Палатæйы минæвæрттимæ фембæлды куыд загъта, афтæмæй ахсджиаг у Уæрæсейы адæмты æвзæгтæ бахъахъхъæнын. Уый тыххæй абон Æппæтæуæрæсеон паддзахадон телерадиокомпани эфиры цæуы 57 æвзагыл æмæ æвзаджы здæхтыл.
Æппæтæуæрæсеон паддзахадон телерадиокомпанийы æмæ регионы æмгуыстады фарстатыл Рифат Сабитов æрныхас кодта республикæйы сæргълæууæг Сергей Меняйлоимæ.
