Ацы хъуыддаг сæххæст кæныны процедурæ у хуымæтæг
Донецкы æмæ Луганскы адæмон республикæтæй ныртæккæ Цæгат Ирыстоны чи ис, уыдонæй 50 адæймагæй фылдæр райстой уæрæсейаг паспорттæ. Ацы хъуыддаг сæххæст кæныны процедурæ у хуымæтæг. Хъæугæ документты номхыгъд у чысыл. Сæ райгуырæн бынæттæ чи ныууагъта, уыцы адæм ног цард куыд аразынц, уый тыххæй радзурдзæн Хъайтмазты Дзерассæ.
Мухамедхановты бинонтæ ныр сты Уæрæсейы Федерацийы æххæстбарджын цæрджытæ. Райстой ног документтæ. 6 мæйы размæ ма Мариуполы цæрджытæ æнхъæл дæр нæ уыдысты, уый афтæ тагъд кæй æрцæудзæн. Цæгат Ирыстоны сты афæдзы райдианæй. Анна Мухамедханова куыд зæгъы, афтæмæй уыцы рæстæгмæ йæ хистæр фырт райдыдта кусын, кæстæртæ та цæуынц скъоламæ.
Æппæт хъæугæ медицинон æххуыс райста Елена Кольчугина дæр. Цæгат Ирыстонмæ фронтмæ хæстæг зонæйæ æрбацыд йæ чызгимæ. Ам, Тæмисчъы базыдта, дыккаг сывæллонмæ кæй æнхъæлмæ кæсы. 3 æмæ рдæг килограммы уæзимæ æмæ 52 сантиметры асимæ лæппу райгуырд чырыстон бæрæгбон – Петр æмæ Павелы бон. Уымæ гæсгæ Елена йæ хъæбулы схуыдта Павел.
Афæдзы райдианæй Донецкы æмæ Луганскы 623 цæрæджы райстой иурæстæгон фиддон фæйнæ 10 мин сомы. Æмбæлы пенситæ æмæ сывæллæттæн æхцайы æххуыс дæр.
Уæрæсейаг паспорт райсынæн цы документтæ хъæуынц, уыдоны номхыгъд дзæвгар æрхуымæтæг кодтой. Хъæуы æрмæст раздæры паспорт æмæ сывæллæтты райгуырды тыххæй æвдисæндар, стæй Уæрæсейы граждандзинад райсыны курдиат.
4-æм октябры 4 ног регионы бацыдысты Уæрæсейы Федерацийы хыгъдмæ. Уæдæй абоны онг Цæгат Ирыстоны 50 адæймагæй фылдæр райстой уæрæсейаг паспорттæ.
