Куысты бынæтты армукъа адих кодтой цалдæр къабазмæ гæсгæ
Къуырийы дæргъы, 29-æм ноябры онг республикæйы студенттимæ фембæлдзысты 50 куыстуаты разамонæгæй фылдæр. Куысты бынæтты армукъа адих кодтой цалдæр къабазмæ гæсгæ. Хицæнæй сæ презентацитæ бацæттæ кодтой хæххон металлургон, информацион технологиты æмæ электрон техникæйы, стæй электромеханикон, юридикон, архитектурон-арæзтадон æмæ экономикон факультетты студенттæн. Ахæм фембæлдтытæ тынг ахсджиаг сты куыд куыстуæтты разамонджытæн, афтæ ахуыргæнинæгтæн сæхицæн дæр. Фадат сын дæттынц сæ гæнæнтæм æмæ уавæртæм бæстон æркæсынæн. Афтæ, зæгъæм, Дзæуджыхъæуы технологон центр «Баспик»-ы кафедрæ арæзт æрцыд Цæгат Кавказы хæххон металлургон институты бындурыл. Уымæ гæсгæ студенттæн сæ бон вæййы ахуыр кæнгæйæ, бæлвырд куыстуæтты фæллой кæнын райдайын дæр. Ахуыры фæстæ та свæййынц куыстуаты æххæстбарджын специалисттæ.
