Раарфæ кодтой æфсæддонты мадæлтæн, æмæ сын сæ зæрдæ загъта, цæмæй сæ хъæбултæ рæхджы сæ хæдзæрттæм æрбаздæхой
Куыд зонут, афтæмæй ноябры фæстаг хуыцаубоны бæрæггонд цæуы мады бон. Уый кадæн арæзт фæцæуынц бирæ мадзæлттæ. Парти «Иугод Уæрæсе»-йы регионалон хайады минæвæрттæ та бабæрæг кодта мобилизацигонд адæмы бинонты. Раарфæ кодтой æфсæддонты мадæлтæн, æмæ сын сæ зæрдæ загъта, цæмæй сæ хъæбултæ рæхджы сæ хæдзæрттæм æрбаздæхой. Куыд ацыд партийы минæвæртты фембæлд æфсæддонты бинонтимæ, уый тыххæй радзурдзæн Тъехты Элинæ.
Заводскойы цæрæг Наталья Лепехина у 9 сывæллоны мад. Йæ хистæр фырт Русланыл 18 азы куы сæххæст, уæд сси æфсæддон. Ныр сæрмагонд æфсæддон операцийы рæстæг æм фæсидтысты Фыдыбæстæ хъахъхъæнынмæ. Фыццаг бонты бацыд тохы æмæ райста уæззау цæфтæ.
Кæстæр сывæллæттæ арæх æрымысынц се фсымæры. Фæкæсынц ын йæ къамтæм. Уырны сæ, тагъд рæстæджы кæй фембæлдзысты, уый.
Сæрмагонд æфсæддон операцийы рæстæг нæ республикæйæ Фыдыбæстæ хъахъхъæнынмæ ацыд бирæ фæсивæд. Уыдонæй иу – Реданты цæрæг Рамазан Матиев. Парти «Иугонд Уæрæсе»-йы регионалон хайады минæвæрттæ йын бабæрæг кодтой йæ бинонты. Рамазаны мад Наталья куыд зæгъы, афтæмæй кæд йæ фырты мысы, уæддæр æй йæ бирæ бинонтæ æнкъард кæнын нæ уадзынц.
Рамазанмæ уæлдай тынгдæр æнхъæлмæ кæсы йæ 3 аздзыд чызг. Уарзы кæсын танкты нывтæм, арæх фæфæрсы хистæрты йæ фыды тыххæй.
Акци ахады æнæхъæн республикæйыл. Партийы минæвæрттæ бабæрæг кæндзысты районты цæрджыты дæр. Иу бонмæ уыдысты 15 æфсæддоны хæдзары.
Æфсæддонты бинонтæн бахастой дыргътæ æмæ æндæр хойрæгтæ. Уæдæ хъæбатырты мадæлтæн та бæрæгбоны кадæн балæвар кодтой дидинджытæ æмæ сын ракодтой зæрдиаг арфæтæ.
