Ахуыргæнæндоны раздæры директор йæ цардæй ахицæн фарон, фæлæ йæ ном ам никуы ферох уыдзæн
Дзæуджыхъæуы 13-æм скъолайы арæзт æрцыд Сæлбиты Иринæйы мысæн изæр. Ахуыргæнæндоны раздæры директор йæ цардæй ахицæн фарон, фæлæ йæ ном ам никуы ферох уыдзæн. Мадзал бацæттæ кодтой йæ райгуырды бонмæ. Иринæйы æрымысынмæ æрæмбырд сты йæ хæстæджытæ, хæлæрттæ, хъомылгæнинæгтæ. Сæлбиты Иринæ ахуырады системæйы бакуыста 50 азæй фылдæр, уыдонæй 20 азы бæрц разамынд лæвæрдта 13-æм скъолайæн. Стыр æвæрæн бахаста мадæлон æвзаг æмæ национ культурæ бахъахъхъæныны хъуыддагмæ. Йæхиуыл нæ ауæрдгæйæ, архайдта рæзгæ фæлтæры ахуыр кæнын патриоттæ уæвыныл æмæ традицион хæзнатæн аргъ кæныныл. Уыдис æм бирæ сфæлыдстадон проекттæ. Афтæ рауагъдад «Ир»-ы редактор Цæрæкты Аллæимæ цæттæ кодта чиныг «13-æм скъолайы истори æмæ йæ абоны цард». Хæстæгдæр рæстæг рацæудзæн мыхуыры.
