Хицауады уæнгтæ æрныхас кодтой Уæрæсейы паддзахадон программæтæ æмæ национ проекттæ куыд æххæстгонд цæуынц, ууыл
Хицауады Сæрдар Дзанайты Барисы разамындæй арæзт æрцыд сæрмагонд æмбырд. Хицауады уæнгтæ æрныхас кодтой Уæрæсейы паддзахадон программæтæ æмæ национ проекттæ куыд æххæстгонд цæуынц, ууыл. Уымæй дарддæр стыр æргом аздæхтой бындурон цалцæджы объекттæм. Уæлдайдæр та – 2023-æм азмæ кæй снысан кодтой, уыдонмæ. Афтæ Цæгат Ирыстоны арæзт æмæ бындуронæй рацарæзт цæуынц социалон инфраструктурæйы объекттæ. Се хсæн – сывæллæтты рæвдауæндæттæ, скъолатæ, амбулаторитæ, поликлиникæтæ, культурæйы æмæ спорты объекттæ. Уæдæ арæзт цæуы фæндаггон инфраструктурæ дæр. Фидæны азмæ нысантыл дзургæйæ, зæгъæн ис æмæ базилын хъæудзæн 160 объектæй фылдæрмæ. Ног социалон инфраструктурæ саразын у нæ фыццаградон хæстæй иу. Уымæн æмæ уымæй аразгæ сты республикæйы цæрджыты æмбæлгæ уавæртæ. Ахæм хæс Цæгат Ирыстоны хицауады раз сæвæрдта регионы Сæргълæууæг Сергей Меняйло. Æппæт уыцы хъуыддæгтыл хъæуы бындуронæй æмæ афоныл кусын, – бахынцта премьер Дзанайты Барис.
