Куыстуаты цæттæ кæнынц дыууæ мин товарæй фылдæр
Санкциты зын рæстæг нæ хынцгæйæ, бирæ куыстуæттæн сæ архайд нæ фæкъуылымпы. Уый нæ, фæлæ ма размæ кæнынц æнтыстджын къахдзæфтæ дæр. Ахæм куыстуæтты хсæн ис завод «Заря Осетии». Йæ нысантæм гæсгæ, фæнд кæнынц дунеон базарадмæ рацæуын. Куыстуаты цæттæ кæнынц дыууæ мин товарæй фылдæр. Сæ сæйраг хай – рухсгæнæн кусæнгæрзтæ. Бæлвырддæр хабæрттæ радзурдзæн Гаглойты Светланæ.
Ирина Науменко кусы слесæрæй. Йæхи дæнцæгæй æвдисы, цыфæнды дæсныйадыл дæр сахуыр кæнæн кæй ис, уый. Завод «Заря Осетии»-йы кусы, бындур æвæрд ын куы рцыд, уæдæй нырмæ. Ныр цыппар азы Иринæ æмбырд кæны рухсгæнæн техникон кусæнгæрзтæ. Кæд слесæры куыст æнцонтæй нæу, уæддæр ыл сахуыр кæнын у алкæйы бон дæр.
«Заря Осетии» кусы дыууæ мин нудæсæм азæй фæстæмæ. Куыстуаты хъомыс æппынæдзухдæр рæзы. Рухсгæнæнтæй ифтонг кæны республикæйы алы районтæ æххæстæй.
Заводы цы рухсгæнæнтæ æмæ прожектортæ аразынц, уыдон æвæрынц канд ахсджиаг социалон объектты нæ, фæлæ ма Дзæуджыхъæуы егъау куыстуæтты дæр. Уымæй дарддæр рухс кæнынц федералон трассæтæ, стæй ма сæ агурынц уæрæсейаг стыр горæтты дæр. Санкциты зын рæстæг стыр заводæн бантыст базарады баззайын. Уый нæ, фæлæ ма у ерысхъом, стæй бафæрæзта ног уавæрты кусынмæ. Ирыстойнаг рухсгæнæнтæ ныртæккæ фенæн ис, сæ цæрджыты нымæц милуан адæймагæй кæмæн ахызт, нæ бæстæйы ахæм горæтты.
Профессионалон рухсгæнæн кусæнгæрзтæ аразæг заводы ма уадзынц дыууæ мин номенклатурон дзауамæйæ фылдæр. Уыдоны хсæн – тренажертæ сывæллæтты ирхæфсæн фæзтæн, уæлдæф сыгъдæггæнæнты 5 хуызы. Пайда сæ кæнынц æхсæнадон транспорты, базарадон центрты æмæ хи кабинетты. Зæгъдзыстæм ма уый дæр, æмæ кусæнгæрзтæ æмбырд кæнынц заводы хи технологимæ гæсгæ. Уымæй дарддæр кусынц ног проекттыл. Уыдон æххæст кæнгæйæ парахатдæр кæндзæн сæ архайд. Заводы разамынд æнгом æмгуыстад кæны куыст дæттыны центримæ. Афтæмæй сæм фæзындзæн ног куысты бынæттæ, стæй ма сæрмагонд ахуырадон курсытæ.
