Сывæллæтты уарзон аргъауы фæзынди ног хъайтартæ, ног музыкæ
Зындгонд аргъау – ирон æвзагыл. Уыимæ ма рагон истори ног хуызы. Ног азы каникултæм Тæбæхсæуты Балойы номыл ирон театры актертæ бацæттæ кодтой спектакль «Золушка». Сывæллæтты уарзон аргъауы фæзынди ног хъайтартæ, ног музыкæ. Уæдæ дзы сæйраг рольты дæр ахъазыдысты æрыгон æмæ курдиатджын актертæ. Афтæмæй, режиссер бацархайдта аргъауы сурæттæ ирддæрæй равдисыныл. Сæ репетицитæ сын бабæрæг кодта не сфæлдыстадон къорд дæр. Бæлвырддæр хабæрттæ радзурдзæн Касаты Наирæ.
Зындгонд аргъау «Золушка»-йы хъайтартæ сдзырдтой иронау. Хивæнд æмæ тызмæг фыдыусимæ иу сценæйы æртæ æнæзонгæ хъайтары. Иннæтæн æнæуынгæйæ баззайгæйæ, йын фæлхат кæнынц йæ алы фезмæлд дæр. Афтæмæй, сылгоймагæн карздæр кæнынц йæ фыдзонддзинад.
Ноджыдæр ма иу ног хъайтар – истори хъахъхъæнæг. Уый та æххуыс кæны алыхуызон æрхъуыдыгонд цаутæ æххæст кæныны хъуыддаджы. Æнæ ацы хъайтары æххуысæй аргъауы алæмæты дуне сфæлгонц кæнæн нæй.
Золушкæйы сурæт сарæзта Земыраты Ольгæ. Актрисæйæн ацы сурæт у уæлдай ахсджиагдæр. Йæхæдæг куыд зæгъы, афтæмæй йæ гыццылæй фæстæмæ уарзы ацы аргъау. Æмæ йын ныр фадар фæци йæ сабидуджы æууæлтæ банкъарынæн.
Аргъау «Золушка» сывæллæтты ахуыр кæны сæ бæллицтыл æууæндыныл, æмæ сæ размæ цы хæстæ æмæ нысантæ сæвæрдтой, уыдонмæ æнæрлæугæйæ тырныныл. Рæсугъд æмæ фæлмæнзæрдæ чызджы истори зонгæ у алкæмæн дæр, уымæ гæсгæ аивадуарзджыты истæмæй дисы бафтауын у зын. Фæлæ, Тæбæхсæуты Балойы номыл ирон театры актертæ уæддæр бацархайдтой, æмæ сабитæм æнхъæлмæ кæсы цымыдисаг истори. Шарль Перройы зындгонд уацмыс ирон театры сценæйы æвдисдзысты 30-æм декабры онг.
