Мадзалы архайдтой Цæгат Ирыстоны нывгæнджыты цæдисы уæнгтæ
«Вернисаж года 2022». Афтæ хуыйны Цæгат Ирыстоны нывгæнджыты ацы азы кæронбæттæн равдыст. Автортæ адæмы размæ рахастой 200 куысты онг. Уыдонимæ ахорæнтæй конд нывтæ, графикæ, скульптурæ, декоративон аивад стæй куклатæ. Равдыст арæзт у конкурсы хуызы. Январы кæрон нывгæнджыты куыстытæн хæдбар жюри скæндзæн аргъ. Бæлвырддæр хабæрттæ радзурдзæн Тъехты Элинæ.
Республикæйы нывгæнджыты цæдисы залы байгом æрвылазон равдыст-конкурс «Вернисаж года 2022″. Мадзалы архайдтой Цæгат Ирыстоны нывгæнджыты цæдисы уæнгтæ. Гасынты Жорж адæмы размæ рахаста, ацы аз цы нывтæ скодта, уыдонæй æртæ. Куыд зæгъы, афтæмæй ахсджиаг у ахæм равдыстытæ кæнын куыд æрыгон аивадуарзджытæн, афтæ нывгæнджытæн сæхицæн дæр.
Гасынты Жорж, РЦИ-А нывгæнджыты уæнг, РЦИ-А адæмон нывгæнæг: «Мах нывгæнджыты хуызæн канд Кавказы нæ, фæлæ Уæрæсейы дæр бирæ нæй. Нывгæнджыты цæдисы ахæм æгъдау æмæ фæтк ис, æмæ алы афæдзы кæрон дæр скæнæм равдыст. Алчидæр æм йæхи фæцæттæ кæны».
Гасынты Жоржæн йæ алкæцы куыстæн дæр ис сæрмагонд истори. Афтæ «Вернисаж года 2022»-йы цы нывтæ равдыста, уыдонæн дæр.
«Вернисаж года 2022» равдыст – конкурс хуымæтæджы нæ хуыйны. Цы куыстытæ дзы ис, уыдонæн аргъ кæндзæн хæдбар жюри. Уæлахиздзаутæн ратдзысты дипломтæ æмæ хцайы призтæ. Фæлæ дзы ис æрыгон нывгæнджыты куыстытæ дæр. Кæд сын аргъ нæ кæндзысты, уæддæр арæхстджын нывæгæнджыты æмрæнхъ куыстытæ æрæвæрын у пайдайаг.
Сабанты Ирбег, Нывгæнджыты цæдисы уæнг: «Алы аз дæр вæййы ацы равдыст. У конкурс. Кусæм, цæмæй хуымæтæг нывгæнджытæ нæ нывтæм кæсгæйæ куыстмæ разæнгард кæной. Уымæн æмæ арæхстджын нывгæнджыты куыстытæ куы уынай, уæд æй æмбардзынæ, цæмæ тырнын хъæуы, уый».
Мадзал у Цæгат Ирыстоны нывгæнджыты кæронбæттæн равдыст. Архайынц дзы 70 авторы æмæ дзы равæрдтой 200 куысты. Уыдонимæ ахорæнтæй конд нывтæ, графикæ, скульптурæ, декоративон аивад стæй куклатæ. Равдыст цæудзæн январы кæронмæ.
