Бынатмæ хæццæ кодтой хойраджы продукттæ стæй материалон-техникон лæггæдты ифтонггæрзтæ
Цæгат æмæ Хуссар Ирыстонæй æфсæддонтæн æмæ Запорожьейы цæрджытæн иумæйаг гуманитарон æххуысы центр бæрæгбæтты рæстæг куыста æнæрлæугæйæ. Бынатмæ хæццæ кодтой хойраджы продукттæ стæй материалон-техникон лæггæдты ифтонггæрзтæ. Уый тыххæй радзырдта центры разамонæг – бархион, батальон «Алани»-йы уæнг Андиаты Сослан. Ацы азы райдианæй волонтертæ гуманитарон уаргъ хæццæ кодтой Запорожьейы æмæ Донецкы позицитæм. Уымæй дарддæр ма баххуыс кодтой Запорожьейы сидзæр сывæллæтты хæдзæртты хъомылгæнинæгтæн, стæй рæвдауæндæтты сабитæн. Цæгат Ирыстоны Сæргълæууæг Сергей Меняйлойы амындмæ гæсгæ æмæ Дзæуджыхъæуккаг æмæ Алайнаг епархийы æххуысæй бæрæгбæтты рæстæг æфсæддон операцийы зонæмæ сæрмагонд бортæй арвыстой иу мин ирон чъирийы онг, адджинæгтæ, хойраджы продукттæ, хъарм дзаумæттæ, пецтæ æмæ афтæ дарддæр.
– Волонтерты куыст æнцон нæу, фæлæ тынг хъæугæ æмæ ахадгæ. Æфсæддонтæ хъуамæ æнкъарой аудындзинад, – загъта Андиаты Сослан.
Уæ зæрдыл уын æрлæууын кæндзыстæм, республикæйы Сæргълæууæг Сергей Меняйлойы уынаффæмæ гæсгæ арæзт æрцыд гуманитарон æххуысы иумæйаг центр. Йæ сæйраг нысан у – цы гуманитарон уаргъ хæццæ кæны, уый банывыл кæнын, стæй бæстон мониторинг кæнын сæрмагонд æфсæддон операцийы зонæйы.
