Уыцы рæстæгмæ дзы сараздзысты бæндæнæй фæндаг æмæ, Дзуджыхъæуыл афæлгæсæн кæмæй уыдзæн, ахæм цалх
Ацы сæрд комплекс «Аланийы парк» суазæг кæндзæн нæ республикæйы цæрджыты. Уыцы рæстæгмæ дзы сараздзысты бæндæнæй фæндаг æмæ, Дзуджыхъæуыл афæлгæсæн кæмæй уыдзæн, ахæм цалх. Парк бахастой Уæрæсейы регионты ног инвестицион хыгъдмæ. Куыстытæ куыд цæуынц, уый тыххæй бæлвырддæр радзурдзæн Тъехты Элинæ.
Бæндæнæй фæндæгты проекттæ Андрей Фомин аразы æппæт дунейæн стæй хæстæгдæр фæсарæнтæн. Цæгæрхохы цы фæндаг уыдзæн, уый арæзт уыд Францийы æмæ дзы ис 4 бынаты. Сахатмæ йæ бон у аирхæфсын мин адæймагæй фылдæры. Ныр уал цæттæ у уæллаг станцæ. Цæмæй адæмæн æнцондæр уа, уый тыххæй дæллаг станцæйы та сараздзысты къахдзоныгътæн сæрмагонд бынат.
Комплекс «Аланийы парчы»» фæзындзæн къахдзоныгъты трассæ дæр. Ныридæгæн кусынц аразгæ митыл, бауагътой дзы коммуникацитæ дæр. Цæгæрхохы фыццаг хатт фæзындзæн центрон электрон тых. Уæдæ доны хæтæлтæ дæр æвæрд æрцыдысты. «Аланийы парк» ис Цæгæрхохы цъуппыл. Уый у Дзæуджыхъæуæй 200 метры уæлдæр. Ам февралы фæзындзæн горæтыл афæлгæсæн кæмæй уыдзæн, ахæм цалх. Йæ дæргъ уыдзæн 41 метры. Специалисттæ нæ тæрсынц боныхъæдæй дæр, уымæн æмæ куы бахъæуа, уæд кусдзæн арæзтады бындур тæвдгæнæн системæ.
Æппæт сезонты кусæг комплексмæ хаудзæн фысымуат дæр. Ныридæгæн цæттæ сты проектон – сментон гæххæттытæ. Тагъд рæстæг сбæрæг уыдзæн арæзтады æмгъуыд дæр.
