Афтæмæй дзы суазæг кодтой 17 гæдыйы æмæ 8 куыдзы
Николаевскæйæ станицæйы цæрæг бинонтæ Роман Харланов æмæ Козаты Татьянæ сæ хæдзары скодтой аздон цæрæгойтæн. Афтæмæй дзы суазæг кодтой 17 гæдыйы æмæ 8 куыдзы. Æрвылбон сæм зилынц, æфсадынц сæ. Цæттæ сты ног цыппаркъахыг уазджытыл сæмбæлынмæ дæр. Бæлвырддæр хабæрттæ радзурдзæн Хъайтмазты Дзерассæ.
Куыдз Атос ам у æппæтæй сæйрагдæр. Йæ къæдзилджын бирæ хæлæрттæ хойрагмæ нæ бавналдзысты, цалынмæ дзы раздзог фыццаг нæ ацахода, уæдмæ. 17 гæдыйы æмæ 8 куыдзы ацы хæдзары цæрынц иу бинонтау. Алчидæр зоны йæ бынат æмæ фæткæвæрд. Фæлæ Атосæн ис уарзондæр хæлæрттæ. Ацы гæдымæ æвналын никæй уадзы. Æрмæстдæр йæхæдæг. Цæрæгойтæн æцæг аздон Николаевскæйы хи хæдзары скодтой æмкъæйттæ Роман æмæ Татьянæ. Куыд зæгъынц, афтæмæй сæм æрвылбон æрбацæуынц дзæгъæл куыйтæ æмæ гæдытæ. Æнæрхъуыдыйæ сæ ничи баззайы. Уый бæрц цæрæгойты бафсадын бинонтæн æнтысы. Сæ рацион алыхуызон у – сæрмагонд хойраг, дзидза, кæсаг, халсартæ. Бинонтæн æххуыс кæнынц се мкусджытæ æмæ зонгæтæ.
Цæрæгойтæм зилын æнцон хъуыддаг нæу. Бон 2 хатты семæ хъæуы тезгъо кæнын. Уæвгæ, бинонты уый нæ тыхсын кæны.
Афтæ зæрдæхæларæй сæ бирæ цæрæгойтимæ Роман æмæ Татьянæ цæрынц 10 азы. Ацы хъуыддаг æххæст кæндзысты дарддæр. Ног цыппаркъахыг уазджытыл алкæддæр æхсызгонæй æмбæлынц.
