Гуманитарон уаргъ фæхъæздыгдæр кодтой хъарм дзаумæттæй, хойраджы продукттæй, къуымбил цъындатæй æмæ фыстæджытæй
«Адæмон фронт. Алцыдæр уæлахизæн!». Дыууæ къуыримæ Цæгат Ирыстоны, проект æххæст кæнгæйæ, сæмбырд кодтой 377 мин сомы фылдæр. Гуманитарон уаргъ фæхъæздыгдæр кодтой хъарм дзаумæттæй, хойраджы продукттæй, къуымбил цъындатæй æмæ фыстæджытæй. Проектмæ се вæрæн хæссынц куыд хицæн адæймæгтæ, афтæ æнæхъæн организацитæ дæр. Афтæ, Дзæуджыхъæуы цæрджытæ æмæ уазджытæ цы хæрзаудæн армукъа «Формула добра»-йы бацархайдтой, уый фæрцы, бантыст фæрæзты хыгъд 183 мин сомы фæфылдæр кæнын. Проектмæ ма се вæрæн бахастой Гергиты Валерийы номыл аивæдты колледжы студенттæ æмæ педагогтæ. 94 мин сомæй фылдæр та фронтæн сæмбырд кодта Архонкæйы станицæйы дыккæгæм скъола. Комгæроны ахуыргæнæндон фондмæ бахаста æнæмæнг хъæугæ дзаумæттæ æмæ 34 мин сомы. Уæдæ уæлахизмæ тырнгæйæ, се ххуысы хай бахастой Иры хъæуы скъолайы педагогон коллектив æмæ ахуырдзаутæ. Адæмон фронты æххæстгæнæн комитетмæ къуымбил цъындатæ бахаста Дзæуджыхъæуы цæрæг Цæрæкты Симæ. Йе рвыстæджы ма бавæрдта арфæтимæ фыстæг дæр.
