Энергоресурстæй цы компанитæ æххæст кæнынц, уыдон адæмы сæхи аххосджын кæнынц, зæгъгæ, коммуникацитæ сæхæдæг барвæндонæй бауагътой къуылымпытимæ
Цæхæрадæтты æмбалад «Наука»-йы цæрджытæ разы не сты, цы коммуналон лæггæдтæ исынц, уыдон хæрзхъæддзинадæй. Энергоресурстæй цы компанитæ æххæст кæнынц, уыдон адæмы сæхи аххосджын кæнынц, зæгъгæ, коммуникацитæ сæхæдæг барвæндонæй бауагътой къуылымпытимæ. Иугонды æмбырды цæрджытæ архайынц сæ риссаг фарстатæ алыг кæныныл, фæлæ æнæ æххуысæй сæ къухы нæ бафтдзæн.
Цæхæрадæтты æмбалад «Наука»-йы цæрджытæ æрæмбырд сты сæ риссаг фарстаты тыххæй радзурыны нысанимæ. Афæдзы æппæтæй уазалдæр бонты сæ хæдзæртты баззадысты æнæ хъармæй. Электрон тых фаг кæй нæй, уымæ гæсгæ прибортæ нæ кусынц, иуæй-иу хæдзæртты нæй газ. Æдæппæтæй «Наука»-йы ис мин хæдзарæй фылдæр.
Хъалаты Константин, цæхæрадæтты æнæкоммерцион иугонд «Наука»-йы цæрæг: «Никæй хъæуæм ам, ничи нæм йæ цæст дары. Горæты администрацимæ цалдæр хатты сидтыстæм. Æмæ ницы. Адæм удхарæй мæлынц. Кæцы молломæ ма ацæуæм, кæцы Хуыцаумæ бакувæм, уый нæ зонæм».
Фарон куыстуат «Россети»-йы хъæппæрисæй ист æрцыд, цæхæрадæтты æмбаладты цæрджытæн ныллæгдæр коэффицентимæ тариф. Тарифты регионалон службæйы бамбарын кодтой, электрон тыхæн фидынæн льготæ кæмæн баззайдзæн, уый.
Гаглойты Жаннæ у юрист. Электрон тых кæй нæ фаг кæны, йæ хæрзхъæддзинад ныллæг кæй у, уымæй бафæллайгæйæ, бæлвырд æркаст энергийæ чи æххæст кæны, уыцы компаниимæ бадзырдмæ. Куыд зæгъы, афтæмæй йæм фæзынд ноджы фылдæр фарстатæ.
Бестауты Валентинæ æмбалад «Наука»-йы цæрæнуат балхæдта 2 азы размæ. У, йе нæниздзинад хъыгдард кæмæн у, ахæм сывæллоны мад. Цæмæй лæппуйæн инвалиды коляскæты æддæмæ цæуыны фадат уа, уый тыххæй равзæрста хи хæдзар. Цæрæнуат балхæдта сæрды, æмæ къуылымпыдзинæдты тыххæй нæ зыдта. Зымæджы æрбацыдимæ бамбæрста, ахæм хæдзары цæрæн нæй.
Сæхимæ Бестаутæ дарынц хъарм уæлæдарæс, фынæй дæр уыдоны кæнынц. Газы пец нæ кусы, хъармгæнæн пец дæр, нæй тæвд дон. Тых фаг кæй нæй, уымæ гæсгæ электрон прибортæ дæр нæ кусынц. Æхсæн машинæ цы у, уый, уæвгæ дæр ферох кодтой.
Куыстуат «Газпром газораспределение Владикавказ»-ы филиалы æмбарын кæнынц, æмбалады коммуникацитæ адæм сæхæдæг сæвæрдтой æмæ газы хæтæлты диаметр фаг нæу. Уый тыххæй цъæх артаг нæ хæццæ кæны кæцыдæр хæдзæрттæм.
Фæстаг аппаратон æмбырды республикæйы сæргълæууæг Сергей Меняйло йе ргом аздæхта цæхæрадæтты æмбаладтæ газæй æххæст кæныны фарстамæ. Профилон ведомствæтæн бабар кодта, фарста алыг кæнынæн сæ тыхтæ баиу кæнын. Уæдмæ та уал «Наука»-йы цæрджыты хъæуы уавæрыл сæхи тыхтæй архайын.
