Ведомствæты хсæн кусæг къорд инспекци скодта цалдæр базарадон объекты
Дзæуджыхъæуы базарадон центртæй иуы арæзт æрцыд, адæм æнæзакъонæй куы куыстой, ахæм цаутæ бæлвырдгæнæн рейд. Ведомствæты хсæн кусæг къорд инспекци скодта цалдæр базарадон объекты. Рейды архайджытæ бæлвырд кодтой кусджыты бæрц, хъалонисæн системæ, кассон аппарат ис æви нæй, уый æмæ хъалонфидæджы идентификацион номер. Инвестицион проектты управленийы сæйраг специалист Æлбегаты Азæмæты ныхæстæм гæсгæ, 2022-æм азы рабæрæг, куыстдæттæгимæ æнæзакъон фæллойадон ахастдзинæдтæ чи сфидар кодта, ахæм 5 мин адæймаджы. Сæ хæстæм куыдфæндыйы цæстæй чи кæсы, ахæм амалхъом адæмы куы рабæрæг кæнынц, уæд кусæг къорды уæнгтæ семæ фæкæнынц æмбарынгæнæн ныхас. Сæ ахастдзинæдтæ закъонмæ гæсгæ сфидар кæныныл куы нæ сразы вæййынц, уæд инспектортæ бацæттæ кæнынц æмбæлгæ гæххæттытæ æмæ сæххæст кæнынц административон мадзæлттæ.
