Санкциты рæстæг цырæгътæ фæсарæнтæй ласæн кæй нæй, уымæ гæсгæ пайда кæнын райдыдтой уæрæсейæгтæй
Нырыккон технологиты руаджы Дзæуджыхъæуы рухсытæ ссудзæн ис иу æрхæцтæй. Санкциты рæстæг цырæгътæ фæсарæнтæй ласæн кæй нæй, уымæ гæсгæ пайда кæнын райдыдтой уæрæсейæгтæй. Кæй зæгъын æй хъæуы сты ирддæр. Ныридæгæн рухс кæнынц горæты бирæ уынгтæ. Бæлвырддæр радзурдзæн Тъехты Элинæ.
Афтæ, иу æрхæцтæй ссудзынц 20 мин рухс æмæ иллюминацийæ фылдæр. Ахæм дистанцион управленийы системæ спеалисттæ хонынц «зондджын» горæт. Модернизаци йын скодтой 10 азы размæ. Кусын кæнгæйæ сын исты къуылымпы куы вæййы, уæд аварион уавæр разыны датчикы.
Фыццаг газы рухсгæнæнтæ Дзæуджыхъæуы фæзындысты 1863-æм азы. Сластой сæ Лондонæй. Фæлæ дзы махмæ схæццæ æрмæстдæр цалдæр. Ныр рухс кæнынц Никитины æмæ Бæллаты Владимиры уынгтæ, стæй къайад фидаргæнæн æвдисæндартæ кæм фæдæттынц, уыцы бæстыхай. Рохуаты аззадысты канд фæтæгены цырæгътæ нæ, фæлæ ма газы цырæгътæ дæр. Æддагон цырагъ – иу йæхæдæг ссыгъд, куы рбаизæр, уæд, æмæ – иу ахуыссыд, фыццаг хуры тынтæ куы федта, уæд. Фæлæ зæронд æмæ ног системæтæм ис иудзинад дæр – разамынды бынат. Æнæнхъæлæджы уавæр аиуварс кæнынмæ ацæуы специалистты къорд.
Дзæуджыхъæу рухсæй сифтонг кæныны хæс ис ацы специалисттыл. Уымæ гæсгæ лæмбынæгæй кæсынц технологиты хæрзхъæддзинадмæ, кæд ног сты, уæддæр. Кæсынц æдасдзинадмæ дæр. Хæлд техникæ цалцæг кæнгæйæ пайда кæнынц тестертæ æмæ мультиметртæй. Æмæ æрмæст хæлд нæ, фæлæ рухс тынг ирд куы нæ уа, уæд дæр.
Цы скодтой, æмæ цы фæнд кæнынц. Райсомæй æмбырдты арæх æрдзурынц горæты цæрджыты фарстатыл рухсы тыххæй.
Горæты цырæгътæй сæ фылдæр сты фæсарæнтæй ласт. Специалисттæ куыд зæгъынц, афтæмæй санкциты тыххæй ногтæ лхæнын зын у. Фæлæ фæнд кæнынц сæхæдæг аразын. Куыд зæгъынц, афтæмæй горæты кæцыдæр уынгтæ рухс кæнынц Уæрæсейаг цырæгътæ. Кæй зæгъын æй хъæуы, сты ирддæр.
Дзæуджыхъæуы администрацийы куыд зæгъынц, афтæмæй фарон бантыст Спутниччы поселокæй Октябрьскæмæ цы фæндаг ис, уый рухсæй сифтонг кæнын. Сæвæрдтой дзы 55 рухс æнцойгæнæны, трасформаторон дæлстанцæ, стæй автоматикон управленийы бынат. Уæдæ фæрухсдæр уыдзæн Трассовыйы уынджы дæр.
Дзæуджыхъæуы талынг уынгтæ фæкъаддæр уыдзысты. Специалисттæ кусынц, цæмæй бирæ цырæгътæ кæм ис, уыцы объекттæ фæфылдæр уой æмæ горæты цæрджытæн æнцондæр уа, уый тыххæй.
