Уæдæй нырмæ ацы мыхуыры фæрæз бирæ хæттыты сси алыхуызон профессионалон конкурсты уæлахиздзау
Рахизфарсы районы газет бæрæг кæны йæ 90 азы юбилей. Фыццаг номыр рухс федта 1933-æм азы февралы. Уæдæй нырмæ ацы мыхуыры фæрæз бирæ хæттыты сси алыхуызон профессионалон конкурсты уæлахиздзау. Редакцийы къорд ныфсджын къахдзæфтæ кæны дзыллон информацион тыгъдады. Къуыри æртæ хатты «Рахизфарсы цард» цæуы районы алы хæдзармæ дæр. Газеты кусджытæн сæ бæрæгбоны фæдыл арфæ ракодта Уæрæсейы журналистты цæдисы цæгатирыстойнаг хайады разамонæг Хъуысаты Тимур. Йæ фиппаинагмæ гæсгæ, газет стыр æвæрæн хæссы мыхуыры фæрæзты райрæзтмæ, æмæ йын уый тыххæй аргъ кæнынц æрмæст Ирыстоны нæ, фæлæ ма иннæ регионты дæр. Фидараты Маринæ радзурдзæн бæлвырддæр хабæрттæ.
Хуызистыты стыр альбомы – газет «Рахизфарсы цард»-ы азфыст. Куысты уæлхъус æмæ фæллад уадзгæйæ дæр æвдыст цæуынц, газеткæсджытæм бæлвырд æмæ цымыдисаг ирформаци чи хæццæ кæны, æмæ кодта, уыдон. Алы къамы бын дæр фенæн ис фыстытæ. Афтæмæй хъахъхъæд цæуынц редакцийы æппæт кусджыты тыххæй дæр мысинæгтæ.
Уацхæсджытæ, корректортæ, редактортæ – ам алчидæр дзуапп дæтты мыхуыры дзырдæн. Дудараты Луизæ газетмæ æрбацыд 20 азы размæ. Æмæ ныры онг дæр йæ дæсныйадмæ уарзондзинад нæ ивы. Адæмимæ кусын нымайы сæйрагдæрыл.
Юбилейон номырмæ фæстаг фиппаинæгтæ хаст æрцыдысты, фæлæ ууыл сæ архайд не рлæууыд. Уæвгæ хабæрттæ æмбырд кæнын у æнæрлæугæ куыст. Къуыри 3 хатты районы цæрджытæм фæхæццæ кæнынц 3 мины 500 сæдæ экземпляры. Газеты 13 кусæджы дарддæр хæццæ кæнынц сæ информацион пост.
«Хъазуатон», «Коммунизмы тырыса», «Рахизфарсы цард». Газеты сæргонд æмæ рæстæг ивынц, æнæивгæ сты мыхуыры фæрæзы сæйраг хæстæ. Адæм раздæрау, æнхъæлмæ кæсынц ног хабæрттæм. 90 азы чысыл æмгъуыд нæу. Фæлæ ма фидæнмæ дæр бирæ фæндтæ æмæ нысантæ. Стыр хæрзиуджыты тыххæй нæ.. Сæйрагдæр у адæмы уарзондзинад, – зæгъынц редакцийы кусджытæ.
