Ис дзы æнцонархайд уавæртæ куыд цæрæгойтæн, афтæ куыстуаты специалисттæн дæр
Дзæуджыхъæуы питомникы арæзт æрцыдысты 110 ног вольеры. Ис дзы æнцонархайд уавæртæ куыд цæрæгойтæн, афтæ куыстуаты специалисттæн дæр. Нырæй фæстæмæ куыйтæм зилдзысты дыууæ ветеринары æмæ дыууæ фельдшеры. Цавæр нысантæ ма ис куыстуаты разамындмæ, уый тыххæй радзурдзæн Фидараты Маринæ.
Дзæуджыхъæуккаг питомникы цыппаркъахыг цæрæгойтæ куыддæр уазджыты фенынц, афтæ уайтагъд фæцымыдис вæййынц. Ныртæккæ ам ис 190 куыдзы. Стыр æмæ гыццыл куыйты дарынц хицæнæй. Амæй фæстæмæ сæ цард зынгæ фенцондæр уыдзæн. Питомникы территорийы арæзт æрцыдысты 110 ног вольеры. Рæхджы се ппæты дæр уыдзæн ног цæрджытæ.
Куыйтæ карантины кæм вæййынц, уыцы бæстыхайы къултæ сты хъæдæй конд, цæмæй цæрæгойтæн тæссаг мацæмæй уа, уый тыххæй. Ног вольерты раз уыдзæн ветеринарон блок. Дыууæ ветеринары æмæ дыууæ фельдшеры нырæй фæстæмæ цæрæгойтæм зилдзысты æнцонвадат уавæрты. Уымæй дарддæр ма ам фæзындзæн хæринаггæнæн бынат æмæ кусджытæн бæстыхай.
Питомникы ма райдыдтой къæбылатæн хъарм блок аразын.
Стерилизаци æмæ биркæтæ бакæныны фæстæ, ветеринартæ сæ цæст фæдарынц куйты æнæниздзинадмæ. Уый фæстæ сæ ауадзынц. Биркæ ууыл дзурæг у, æмæ цæрæгой у æдас, скодтой йын æмбæлгæ процедурæтæ. Питомникы кусджытæ се ппæты зæрдыл лæууын кæнынц – æнæхæдзар куыйтæ горæты уынгты фенæн кæй ис, уый дзурæг у ууыл, æмæ сæм адæмы рдыгæй æвзæр цæстæнгас кæй уыдис.
Ивгъуыд аз питомникæй хæларзæрдæ адæм сæхицæн райстой 70 цæрæгойы. Фылдæр уыдысты къæбылатæ æмæ хæрзмыггаг куыйтæ. Иннæ цæрæгойтæ нырма æнхъæлмæ кæсынц ахæм хорзæхмæ.
