Уый фæдыл æнæнхъæлæджы уавæрты министрады кусджытæ æмæ газы куыстуæтты специалисттæ рацыдысты радон рейды
Фæстаг рæстæг фæфылдæр сты, адæм сыгъдхъæстæ кæм фесты, ахæм цаутæ. Уый фæдыл æнæнхъæлæджы уавæрты министрады кусджытæ æмæ газы куыстуæтты специалисттæ рацыдысты радон рейды. Бабæрæг кодтой цалдæр уынджы хи хæдзæрттæ, æмæ федтой газы кусæнгæрзты хæрзхъæддзинад. Специалисттæ се ппæты зæрдыл лæууын кæнынц – газ у тынг тæссаг, уымæн æмæ йын йæ тæф бамбарæн нæй. Уымæ гæсгæ фарстамæ хъæуы бæстон кæсын. Бæлвырддæр хабæрттæ радзурдзæн Фидараты Маринæ.
Радон бæрæггæнæн куыст арæзт æрцыд, газы кусæнгæрзты хæрзхъæддзинад сбæрæг кæныны нысанимæ. Николай Гречкин хи хæдзары цæры 40 азмæ хæстæг. Уыцы мгъуыдмæ кусæнгæрзтæ æмæ сæм домæнтæ ивд æрцыдысты цалдæр хатты.
Адæмæн сæ фылдæр ахæм бæрæггæнæн куыстмæ хорз цæстæй кæсынц, æмæ специалистты æрбауадзынц сæ хæдзармæ. Уыимæ ма профессионалон æркаст 15 минутæй фылдæр нæ бацахсы.
Уый нæ хынцгæйæ, сыгъдхъæстæ чи фæци, ахæм адæмы нымæц фæстаг рæстæг фæфылдæр. Уый вæййы сезонмæ гæсгæ. Ома уазал рæстæг куы ралæууы, æмæ адæм хъармгæнæн прибортæй пайда кæнын куы райдайынц, уæд. Уыимæ алы адæймагыл дæр сыгъдхъæстæ алыхуызон фæбæрæг вæййы. Газы æууæлтæ дæр афтæ. Зæгъæм, сывæллæттæ газ сæхиуыл тынгдæр банкъарынц. Ам сæйргдæр у – цалынмæ тагъд æххуысы бригад æрбацæуа, уæдмæ сыгъдæг уæлдæф æрбауадзын, æмæ хъыгдардбаййафæджы æддæмæ ракæнын.
Горгазы зæгъынц, кусæнгæрзтæ сæвæрыны размæ сæм хъæуы бæстон æркæсын Уый тыххæй та хъæуы специалисттæм бадзурын. Уыдон цыфæнды аиппытæ дæр рагацау рабæрæг кæнынц.
Специалисттæ се ппæты зæрдыл лæууын кæнынц – газ у тынг тæссаг, уымæн æмæ йын йæ тæф бамбарæн нæй. Уыимæ йæ дыууæ-æртæ хатты куы сулæфай, уæд адæймагæн йæ бон у амæлын. Хъæуы ма бæстон цæстдарын вентиляцион каналтæм дæр.
Уымæ гæсгæ æнæнхъæлæджы уавæрты министрады кусджытæ зилынц хæдзæрттыл. Куыд зæгъынц, афтæмæй ахæм куысты сæйраг нысан у – фыццаджыдæр цæрджыты æдасдзинадыл бакусын.
