Афтæ хаст æрцыд уынаффæ, нæ республикæйы хицауады уæнгты иу боны мызд арвитыны тыххæй
Цæгат Ирыстон йе вæрæн хæссы, Турчы æмæ Сирийы зæххынкъуысты хъыгдардбаййафæг ирон адæмæн æххуысмæ. Афтæ хаст æрцыд уынаффæ, нæ республикæйы хицауады уæнгты иу боны мызд арвитыны тыххæй. Ахæм хъæппæрис аппаратон æмбырды фехъусын кодта регионы разамонæг Сергей Меняйло. Фæрæзтæ радих кæндзысты премьер-министр, йæ æппæт хæдивджытæ, стæй республикон министрадты æмæ ведомствоты разамонджытæ. Республикæйы сæргълæууæг ма бабар кодта зынгсирвæзты ныхмæ æдасдзинады системæ сбæрæг кæнын. Бæстон æркæсын хъæуы скъолаты æмæ социалон уагдæтты эвакуацион рацæуæнтæм. Ахæм бæрæггæнæн куыст скæнын хъæуы, ивгъуыд къуырийы Мæздæджы скъола-интернаты зынгсирвæзт кæй æрцыд, уымæ гæсгæ. Ныридæгæн ахуыргæнæндоны процесс ногæй райдыдта. 40 ахуырдзауы уал æхсæвы вæййынц Мæздæджы дыккæгæм интернаты. Ахуырадон объектæн зиан æрхастæуыд 13 милуан сомы аргъæн. Уый – кусæнгæрзты аргъ нæ нымайгæйæ. Бæрæггæнæн куыст ныртæккæ кæны Цæгат Ирыстоны прокуратурæ. Æмбырды ма ныхас цыд эпидемиологон уавæрыл. Грипп æмæ æхснырсæджы аххосæй æхгæд æрцыдысты 8 скъолайы, 16 рæвдауæндоны. Уымæй дарддæр ма 53 къласы æмæ 26 къорды. Уыимæ ма рынчынты нымæц кæны фылдæр. Уый тыххæй фехъусын кодта ахуырады æмæ наукæйы министр Алыбекты Эллæ. Уавæр банывыл кæныны тыххæй Сергей Меняйло бахаста фæндон, чи рбахæццæ кæны, уыцы бæрæгбæттæм ма цалдæр фæлладуадзæн боны бафтауын.
