Æххуыс сын кæнынц, цы зындзинæдтимæ сæмбæлынц, уыдон алыг кæныны хъуыддаджы
Цæгат Ирыстоны мобилизационд адæмы бинонтæм сæ цæст дарынц социалон æххуысы республикон центры специалисттæ. Æххуыс сын кæнынц, цы зындзинæдтимæ сæмбæлынц, уыдон алыг кæныны хъуыддаджы. Кæй зæгъын æй хъæуы, чысыл не сты. Фæллойы æмæ социалон рæзты министрады ахадгæ куыст цæуы, æрмæст мобилизацигонд адæмæн нæ, фæлæ æфсæддон цауты æппæт ветерантæн алывæрсыг æххуыс кæныны фæдыл. Бæлвырддæр хабæрттæ радзурдзæн Хъайтмазты Дзерассæ.
Матиевты бинонтæ октябры сæ хъахъхъæнæджы афæндараст кодтой æфсæддон æмбырдтæм. Уæдæй фæстæмæ сæм арæх уазæгуаты æрбацæуынц социалон æххуысы республикон центры кусджытæ. Базонынц, бинонты цавæр æххуыс хъæуы. Уый у ведомствæйы раззагдæр хæстæй иу.
Абон чысыл Элладæ иумæйаг хуызтистытыл фронтæй æппæт хæстонты хсæн æнæ рæдыдæй уайтагъд базоны йæ фыды.
Уый ныр 3-аздзыд саби нал фæкæуы, йæ фыды кой куы фæкæнынц, уæд. Фыццаг рæстæг, сывæллон йæ ныййарæджы тынг мысыд. Бинонтæн æххуыс кодтой социалон лæггад кæныны комплексон центры психологтæ.
Рамазан Матиевы мад йæ цæссыг нæ уромгæйæ дзуры, йæ фырт мобилизаци куы расидтысты, уый фæстæ куыд сфæнд кодта Райгуырæн бæстæ хъахъхъæнынмæ ацæуын, уый тыххæй. Абон, кæд Наталья нæ хъаст кæны, уæддæр бæрæг у, хæдзары нæлгоймаджы къухтæ кæй нæ фаг кæны. Уымæн æвдисæн сты арæзтад æмæ цалцæг кæронмæ кæй нæ фесты, уый. Стæй ма æндæр æнæлыг социалон фарстатæ. Æнæ ахадгæ юридикон консультацийæ хъуыддаг йæ бынатæй бирæ рæстæг не змæлыд. Æххуысмæ æрбацыд паддзахад.
Алы бинонты цы хъæуы, уый сбæрæг кæнын, æнæмæнг, æнцон нæу. Уымæ гæсгæ социалон лæггад кæныны кусæнуатты специалистты хæс у алы фарста алыг кæныныл дæр сæрмагондæй архайын – продукттæй æххæст кæнынæй сывæллонæн рæвдауæндоны бынат самал кæныны онг.
Республикæйы хицауадон оргæнтæ бацæттæ кодтой мобилизацигонд адæмы бинонтæн æххуысы æмæ социалон гарантиты мадзæлттæ. Алы бинонты цы хъæуы, уымæ гæсгæ арæзт цæуы социалон лæггæдты сæрмагонд программæ – социалон паспорт.
Мобилизацигонд адæммæ æмæ сæ бинонтæм бирæ фарстатæ сæвзæры. Се *ппæтмæ дæр æркæсынæй зæрдæ æвæрынц фæллойы æмæ социалон рæзты министрады. Уым ахадгæ куыст цæуы æрмæст мобилизацигонд адæмæн нæ, фæлæ æфсæддон цауты æппæт ветерантæн æххуысы мадзæлттыл.
